Aningaasat nassaarineqarput: Piumassuserinngisaminnik kinguaassiorsinnaanngitsunut 3 millioninik ikiorsiissutissaqalissasoq

Siullermik ikiuisoqarniarpoq. Aningaasassalli tammarput, maannali nassaarineqaqqipput. Naalakkersuisut kinguaassiorsinnaanngitsut Danmarkimi reagensglas atorlugu 2024-mi katsorsartissinnaanissaannut 3 millionit koruuninik immikkoortitsipput.

Allattoq Birgitte Kjeldsen

apriilip 05-at 2024 16:22

Nutserisoq Connie Fontain

Aappariit meerartaarniarnissamut IVF imaluunniit ICSI atorlugu katsorsartinnissamut ikiorneqarnissamik neriuuteqarsimagaluartut januaarimiilli qulangaatsiarsimapput.

Naak siorna aggustimili aningaasanut inatsimmi 8,7 millionit koruunit piumassuserinngisaminnik kinguaassiorsinnaanngitsunut immikkoortinneqarnissaannut pilersaaruteqartoqarsimagaluartoq aningaasat aningaasanut inatsisissap isumaqatigiinniutigineqarnerata naggataani illuartinneqarsimapput.

Aningaasalli taakku maanna nassaarineqaqqissimarpasipput, piumassuserinngisaminnillu kinguaassiorsinnaanngitsut aappariit IVF-imik imaluunniit ICSI-imik 2024-mi katsorsartinnissamut periarfissaqaqqilerlutik.

Aamma atuarukDemokraatit piumassuserinngisaminnik kinguaassiorsinnaanngitsut ikiorneqarniarnerat taamaatinneqartoq eqqarsarnartoqartikkaat

Danmarkimi reagensglasi atorlugu katsorsaanissamut 3 millionit koruuninik ikiorsiissuteqarneq naalakkersuisut aallaqqaasiutigalugu immikkoortippaat. Peqqinnissamut naalakkersuisoq, Agathe Fontain tusagassiuutinut nalunaarummi oqarpoq.

IVF aamma ICSI-mik suliaritinnerit suuppat?

IVF kalaallisut mannissaq mannissaqarfimmit peerlugu qummuattaaqqami igalaaminermi pilersitsinertut taaneqarsinnaavoq.

ICSI anisooq pitsaanngeqigaangat imaluunniit IVF atorlugu siusinnerusukkut pilersitsinermi mannissat amerlanngissimagaangata atorneqartarpoq. ICSI-mik suliarinninneq peersami cellit ataasiakkaarlugit kapuummik mannissanut ikkunneqartarput.

Tamatuma saniatigut pisariaqartitsineq annerussappat ukioq manna saniatigut 5,7 millionit koruuninik immikkoortitsisoqaqqinnissaa periarfissaassasoq allappoq.

Aningaasat taakku ataatsimoortikkaanni taakku katillugit 8,7 millionit koruuniupput, taama annertussuseqartut siorna aggustimi aamma neriorsuutigineqarsimapput.

Aamma atuarukNaalakkersuisoq kinguaassiorsinnaanngitsut pillugit paatsiveerusimaartoqareersorlu iliuuseqarniartoq

Ikiorsiissuteqarsinnaaneq aappariinnut ukioq ataaseq sinnerlugu najugaqatigiissimasunut ataatsimullu meeraqariinngitsunut neqeroorutigineqarsinnaavoq. Tamatuma saniatigut ”arnaq 38-nik ukioqarluni imaluunniit inuusunnerulluni nakorsamiit innersuunneqarsimanermik takussutissiisinnaappat” arnap 40-liinissaata tungaanut tamanna neqeroorutigineqarsinnaasoq tusagassiuutinut nalunaarummi allassimavoq.

Tamatuma saniatigut Danmarkimut pingasoriarluni katsorsartikkiartornissamut neqerooruteqartoqarsinnaavoq.

Aningaasat tammartut

Aningaasat suminngaanniit nassaarineqarnersut, tusagassiuutinut nalunaarummi allassimanngilaq.

Aamma tulliani kingornalu aamma ikiorsiissuteqartoqartassanersoq allassimanngilaq.

- Peqqinnissaqarfiup passunneqarnissamut neqeroorut massakkut aallartissavaa ukiullu affaa qaangiuppat nalilersuisoqareerpat suliaritittarneq pillugu sukumiinerusumik pisariaqartitsineq nalilerneqarsinnaalissaaq. Tassami 2025-mut Aningaasanut Inatsit aqqutigalugu aalajangersimasunik aningaasaliisoqartalerneratigut reagensglas atorlugu passunneqarnissamut neqeroorutip ataavartumik periarfissaalernissaa kissaatiginartikkaluaqigakku, peqqinnissamut naalakkersuisoq, Agathe Fontain tusagassiuutinut nalunaarummi oqarpoq.

KNR-ip piumassuserinngisaminnik kinguaassiorsinnaanngitsunut ikiorsiissuteqarneq pillugu naalakkersuisut itinerusumik oqaaseqartinniarsarai.

Nutaarsiassami kukkunermik nassaarsimaguit uunga allaffigineqarsinnaavugut.