Naalakkersuisoq kinguaassiorsinnaanngitsut pillugit paatsiveerusimaartoqareersorlu iliuuseqarniartoq

Piumassuserinngisaminnik kinguaassiorsinnaanngitsunut aningaasassarsiortoqaqqissaaq. Tamannalu erngertumik suliarineqassalluni.

Aningaasanut naalakkersuisoq, Erik Jensen (Siumut) 9 millionit koruunit paatsuungassutaangaatsiarnerisa kingorna oqarpoq.

9 millionit koruunit ukioq mannamut aningaasanut inatsimmi immikkoortinneqarsimapput, aningaasalli tammaqqeriataarput.

- Taakkua angajoqqaanngorusuttut arlaatigut periarfissanik ujartuerusuttut utaqqilussinnannginnarnissaat qulakkeerniarlugu sukkasuumik naammassiniarsarivarput. Ullulernissaali ajornakusoorpoq, Erik Jensen KNR-imut oqarpoq.

Taamaammat aappariinnut ukioq manna ikiorneqarnissaminnut utaqqisimasunut ikiorsiissuteqartoqangajalersinnaavoq.

Anignaasallu tassanngaannaq peerneqartut

Tamanna nutaatut pitsaasuuvoq. Ajortuali 9 millionit koruunit immikkoortinneqarsimasut peerneqariataarnerat akisussaaffigineqarumanngillat.

Inatsisartuni partiit tamarmik piumassuserinngisaminnik kinguaassiorsinnaanngitsut peqqinnissaqarfiup akiligaanik Danmarkimukarlutik IVF-imik ICSI-millu nakorsartissinnaanissaat isumaqatigiissutigisimagaluarpaat.

Angalanermut, najugaqarnermut misissortinnermut nakorsartinnermullu aningaasartuutit tamarmik peqqinnissaqarfimmit akilerneqartussanngoraluarput – 9 millionit koruunillu tassunga atorneqartussaagaluarlutik. Taamani aningaasanut naalakkersuisup, Naaja Nathanielsenip (IA) pilersaarutit tulluusimaarluni aggustimi saqqummiuppai.

Decembarimulli uteqqeriarutta.

Demokraatit peqqinnissaq pillugu oqaaseqartartuata, Bjørk Lange Olsenip peqqinnissamut naalakkersuisoq, Agathe Fontain (IA) kinguaassiorsinnaanngitsut nakorsartinnissaannut atatillugu apeqquteqarfigaa. Taassuma ukiutigut killissarititaasoq paaserusussimavaa.

Aningaasat inatsisissatut siunnersuutip, Inatsisartuni allannguutissatut siunnersuummik suliaqartoqarnerani kingullermeerneqarnerani peeqqinneqarsimasut tassani paasitinneqarpoq. Tamatuma saniatigut tamanna aningaasanut inatsisissap isumaqatigiinniutigineqarnerani pisimammat tamanna Erik Jensenip akisussaaffigigaa allappaa.

Partiinut inuiaqatigiinnulluunniit – nalunaaruteqartoqanngilaq.

Naalakkersuisoq, Erik Jensen (S) allannguutissatut siunnersuummik - tassa kinguaassiorsinnaanngitsut nakorsartinnissaannut tunngatillugu aningaasanut inatsimmit peersinermut atsiortuuvoq.

Agathe Fontain pisuutikkaa

Taamaakkaluartorli Agathe Fontain peqqinnissamut naalakkersoq Inatsisartullu pisuutippai.

- Peqqissutsimut isumaqatiginninniarneq peqqissutsimut naalakkersuisup soorunami ingerlatarivaa, partiit assigiinngitsut oqaloqatigalugit taakku ingerlallugit. Ilumoorpoq, Inatsisartut upernaaq aalajangerput, taakkua meerartaarsinnaanngitsunut periarfissiissutit, aningaasaliiffigineqarnissaallu tunngasunik taakkua qulakkeerinnittoqarpoq, partiinit tamaniit Intsisartuni akuersissutigineqarluni, Erik Jensen oqarpoq.

- Taassuma kingorna aningaasanut inatsit siullermeerneqarmat saqqummiunneqarmat taakkua aningaasat ilaapput. Taamaattorli aamma taassuma kingorna partiit isumaqatiginninniarput peqqissutsimut tunngatillugu qanoq tulleriiaarisoqassanersoq, ukiuni tulliuttuni assigiinngitsuni suliniutini. Taamaattumik Inatsisartut namminneq aalajangernerat, tulleriiaarinerat allaanerusoq saqqummiunneqarluni. Taannalu aallaavigalugu Naalakkersuisut sulisussaavugut, taanna oqarpoq, nangillunilu:

- Kisiat uagut Naalakkersuisuninngaanniit Inatsisartut sulisitsisugut taamatut aalajangersimagaluartulluunniit aamma siusinnerusukkut aalajangerneqarsimasoq, isumaqaratta pingaaruteqartoq, suliniummik aallartitsivugut, taamaalilluta aamma taakkua aningaasat nassaarineqarnissaat qulaajarlugit aallartileruttorpagut, taamaalilluta qulakkeernissaat aamma ilaatinnissaat suliarillutigu aallartileruttorlutigu.

Nunatsinni kinguaassiorsinnaanngitsunut saniatigut ikiuisoqarnissaanut qulartitsilersumut, aningaasat tammarnerannut akisussaaffimmik tiguserusuttoqarpasinngilaq.

Aningaasallu qanoq ilillutik peerneqarnersut iluamik nassuiaatigineqarsinnaanngilaq. Taamammat neriuutissaq ataasiinnaavoq, tassa Erik Jensenip neriorsuutaata nutaap piviusunngortinneqarnissaa aningaasallu arlaannit tiguneqarnissaat.

KNR-ip Peqqinnissamut Naalakkersuisoqarfik oqaaseqartinniarsaraa. Tassanngali Erik Jensen innersuussutigineqarpoq, ”suliamummi tunngatillugu apeqqut aamma aningaasanut inatsisip akuerineqarnera” taassuma akisussaaffigimmagu.