Demokraatit piumassuserinngisaminnik kinguaassiorsinnaanngitsut ikiorneqarniarnerat taamaatinneqartoq eqqarsarnartoqartikkaat

Aggustimi aningaasaqarnermut naalakkersuisuusimasup, Naaja Nathanielsenip (IA) piumassuserinngisaminnik kinguaassiorsinnaanngitsut ikiorneqarnissaannut 9 millionit koruunit missaannik immikkoortitsinissamut pilersaarutit tulluusimaarluni saqqummiuppai.

Aningaasat Danmarkimi IVF-imik ICSI-imillu nakorsartinnermut atorneqartussaapput, tassanilu angalanermut,  ineqarnermut, misissortinnermut nakorsartinnermullu aningaasartuutit tamarmik peqqinnissaqarfiup akiligassaanut ilaasussanngussallutik.

Pilersaarulli taanna qatangiinnarsimasoq paasineqarpoq.

Tamannalu aappariinnut kinguaassiorsinnaanngitsunut ikiuisoqalernissaanut suliniuteqaqataasup, Demokraatit peqqinnissamut tunngatillugu oqaaseqartartuata, Bjørk Lange Olsenip eqqarsarnartoqartippaa.

- Siullermik tupaallaatigisorujussuuara. Eqqarsarnartoqartingaatsiarpara. Suliamimi tassani piumassuserinngisaminnik kinguaassiorsinnaanngitsut nakorsartinneranut pitsanngorsaanissamut aningaasaliisoqarnissaa pillugu upernaaq partiit tamarmik akornanni isumaqatigiissuteqartoqarpoq, taanna oqarpoq, nangillunilu:

- Taama iliortoqarsimanngitsoq paasillugu soorunami pakatsinartorujussuuvoq. Tassa aningaasanut inatsisissap isumaqatigiinniutigineqarnerata naggaterpiaani aningaasat aalajangerneqareersimagaluartut taamaatinneqarsimapput. Tamanna pakatsinartorujussuullunilu tupigutsannarpoq, Bjørk Lange Olsen oqarpoq.

Pitsaananilu unneqqaserlunnerusoq

Aningaasanik immikkoortitsinngiinnartoqarsimanera Demokraatit oqaaseqartartuata decembarip qiteqqunnerani aatsaat paasivaa. Taassuma peqqinnissamut naalakkersuisoq, Agathe Fontain (IA) nakorsartinnissamut ukiutigut killissarititaasoq pillugu apeqquteqarfigaa.

Aningaasat inatsisissatut siunnersuutip, Inatsisartuni allannguutissatut siunnersuummik suliaqartoqarnerani kingullermeerneqarnerani peqqinneqarsimasut tassani paasitinneqarpoq.

Partiinut inuiaqatigiinnulluunniit – nalunaaruteqartoqanngilaq. Tamannalu Bjørk Lange Olsenip ernumanartippaa:

- Unneqqarilluinnarlunga oqassaguma tamanna pitsaanngitsumik unneqqaserluttumillu politikkimik ingerlatsineruvoq. Aappariinnut ukununnga ikiuisoqalernera tulluusimaarutigineqariarluni taamaatiinnarneqarpoq.

- Politikikkimik ingerlatsineq taanna kusanarpallaanngilaq, taanna oqarpoq.

Ilungersuutiginniinnassasoq

Aappariinnut kissaatiginerpaasaminnik piviusunngortitsinissamut ikiorneqarnissaminnik  qilanaartunut tamanna soorunami uggornangaatsiartoq Bjørk Lange Olsenip erseqqissaatigaa.

Kingunerluutaallu annertunerungaatsiarsinnaasorai:

- Inuiaqatigiinnummi ajornartorsiutaavoq annertooq, inuiaqatigiinni suliassanik kivitsisussat ikiliartuinnavippugut. Aammali inunnut ukununnga meerartaarniarlutik ilungersungaatsiartunut ikiorneqanissaq pingaaruteqarluinnarpoq. Inuimmi taakku kissaateqarluinnartuupput, taanna oqarpoq.

Bjørk Lange Olsenilli Demokraatinit ikiuinissap qulakkeerallarnissaanut iliuuseqarpallaarsinnaanatik nassuerutigaa. Suliaq naammassineqarluni aalajangiiffigineqareerpoq.

Kisianni taama tunniutiinnarnianngillat. Taakkumi kinguaassiorsinnaanngitsut ikiorneqalernissaat aningaasanut inatsisissap ukiup ataatsip missaa qaangiuppat tullissaani isumaqatigiinniutigineqarnissaanut ingerlassagaluarpalluunniit ilungersuutigiinnarniarpaat:

- Demokraatinit piumassuserinngisaminnik kinguaassiorsinnaangitsut ikiorneqarnissaat ilungersuutigiinnarniarparput. Tassanilu tapersiisoqareerpoq. Partiimmi tamarmik ikiuisoqarnissaa isumaqatigiissutigaat. Taamalu pisoqarsimannginnera tupinnaannartoq, taanna isumaqarpoq.

Aningaasat 8,7 millionit koruunit sumut tammarsimanersut erseqqarinngilaq. Naalakkersuisulli, Agathe Fontainip Bjørk Lange Olsenimut allakkatigut akissutaani ilaatigut ima allassimavoq ”siunertanut allanut nuunneqarput, matumani peqqinnissaq pillugu isumaqatigiissutigineqaqqammerluinnartup aningaasalerneqarnissaa ilanngullugu”.

KNR-ip Peqqinnissamut Naalakkersuisoqarfik aamma Aningaasaqarnermut Naalakkersuisoqarfik oqaaseqartinniarsarai.