Kulunnguaq Jafetilu meerartaarusullutik 160.000 koruuninik atuisut
Kulúnnguaq Petersen naartulernikuugaluarpoq, kisianni katannikuuaa.
Taassuma aappanilu Jafet Við Stein aningaasat katersatik Danmarkimut suliaritikkiartorluni naartulersinnaanissaminut atorusuppaat. Suliaritinnissarli akikinngilaq 50.000 koruuninik naleqarpoq.
Suliaritinnerup saniatigut angalanissamut, unnuinissamut nakorsaatinullu aamma aningaasartuuteqassapput.
Aappariit oqaluttuarnerat naapertorlugu meerartaarusullutik aningaasat 160.000 koruunit atoreerpai. Maannali pingajussaanik suliaritilluni misileeqqinniarlutik anigaasanik katersipput.
- Aningaasat sipaakkagut suliaritinnissannut taamaallaat atorusuppagut, Kulúnnguaq Petersen oqarpoq, taanna ilinniartitsisuuvoq.
Nunatsinni meerartaarsinnaanngitsut Danmarkimut suliaritikkiartortarnerat politikikkut 2019-imiit atorunnaarsinneqarpoq. Tamannali maanna aamma politikikkut allanngortinniarneqalerpoq.
Peqqinnissaqarfik tamakkiisumik akiliisassaaq
Meerartaarsinnaanngitsut namminneerlutik angalanissartik najugaqarnissartillu isumagisalertussaammassuk neqeroorutaasartoq atorunnaarsinneqarpoq – tamannali nunatsinni assigiinngisitsilluni sullissinertut taaneqarpoq.
Atorunnaarsinneqarnerata kingorna meerartaarsinnaanngitsut nammineq aningaasanik katerseqqaarlutik suliaritikkiartornissartik isumagisarpaat.
AAMMA ATUARUK Naartorusuttut Danmarkimut misissortillutillu nakorsartikkiartortarnerat unitsikkallarneqartoq
Pisortat akiligaannik peqqinnissaqarfimmiit ikiorneqaqqittalernissaq, Demokraatineersup Anna Wangenheimip anguniarpaa.
Tassa angalaneq najugaqarnerlu peqqinnissaqarfiup tamakkiisumik akilertalissagaa, Anna Wangenheim isumaqarpoq.
IVF kalaallisut mannissaq mannissaqarfimmit peerlugu qummuattaaqqami igalaaminermi pilersitsinertut taaneqarsinnaavoq.
ICSI anisooq pitsaanngeqigaangat imaluunniit IVF atorlugu siusinnerusukkut pilersitsinermi mannissat amerlanngissimagaangata atorneqartarpoq. ICSI-mik suliarinninneq peersami cellit ataasiakkaarlugit kapuummik mannissanut ikkunneqartarput.
Taassuma IVF-imik aamma ICSI-imik napparsimmavissuarmi Rigshospitalimi suliaritittoqartarnerata peerneqarnikuunera uterteqqikkusuppaa.
- Inuiaqatigiinni angajoqqaat peqqissut nukittuullu pingaarnersiorlugit politikkeritut sulinianngilagut? IVF aamma ICSI ikiorsiisarnerit nammineq piumassuserinngisaminik meerartaarsinnaanngitsunut neqeroorutigisanngikkutsigit innuttaasut nukissaqarluartut nunanut allanut soorlu IVF-mik ikiorsiisinnaassusilinnut nuunnerisigut annaanissaat kingunerisinnaavaa, Anna Wangenheim oqarpoq.
- Nunatsinni ikiorsiisarnerit tamarmik qulakkeersinnaanatigit paasilluarparput kisiannili taamatut inissisimasoqartillugu inuiaqatigiittut piareersimaffigisariaqarparput soorlu Rigshospitalimi ikiorsiinerit qulakkiissallugit.
Eqqarsartaatsikkut ilungersortut
Anguniagarli taanna Kulúnnguaq Petersenimip Jafet Við Steinimiillu tusarluarneqarpoq.
Rigshospitalimi suliaritinnissamut aningaasartuutaasinnaasut 2019-imi missingersorneqarput.
Suliaritinnerit 40-t ukiumut 6 millionit koruuninik naleqartussatut naatsorsorneqarput.
Aningaasartuutit angalaneq najugaqarnerlu ilanngullugit missingersorneqarput.
Qanorli amerlatigisunit neqeroorutip atorneqarnissaa qularineqarmat Peqqinnissaqarfimmiit angalanermut ikiorsertikkiartornermut ineqarnermullu aningaasartuutaajumaartussat qanoq amerlatigissanersut naatsorsoruminaatsinneqarpoq.
- Nuanneq, isumalluarnaq, aappariit Sisimiormiut oqarput.
- Aningaasarpassuit soorlu atoreerlugit ilaa taamatut kinguneqanngitsoortoq soorunami uagutsinnut oqitsuinnaannginnami aamma. Saniatigullu psykikkut attorteqqaneq taanna aamma pigigatsigu.
Taanna ulluinnarni tankersuarnik nakkutilliisuuvoq.
Taassuma arnaatini Kulúnnguaq Petersen allallumi meerartaarsinnaanngitsut suliaritinnissaminnut nunatsinni peqqinnissaqarfimmiit aningaasatigut ikiorserneqarsinnaasannginnerat paasiuminaatsippaa, akerlianili naartuersinneq akeqanngitsoq.
- Soorlu uagut Danmarkimut aatsaat ikiorserneqarluta naartuniarneq anguneqarsinnaasoq, taava sooq naartuersittartut kisimik aningaasaliiffigineqartassappat illuatungaalu aningaasaliiffigineqaratik. Tassuunakkut aamma eqqarsarnartoqarpoq; Nunatsinniiginnassaaguut? Taava oqarfigineqartarpugut; danmarkiliarussi naartunissassi tungaanut ikiorserneqassaasi akeqanngitsumik.
- Tunniutiinnarusunngilagut suli nukissaqartilluta taavalu angorusoqaarput. Kisianni taakku aningaasat aporfiusaramik; nammineq katersineq katersineq atupallattarparput allanut katersiunnaarluta, taakkununnga atugassatsinnik katersilertarpugut.
Taakku 2019 sioqullugu peqqinnissaqarfiup akiligaanik pingasoriarlutik meerartaarnissamik suliaritereernikuupput. Taamani aamma iluatsinngitsoorput.
