Naartorusuttut Danmarkimut misissortillutillu nakorsartikkiartortarnerat unitsikkallarneqartoq

Nammineq pisuussutiginagu meerartaarsinnaanngitsut ilaat, tassalu atortorissaarutit aatsaat atorlugit naartulersinnaasut, misissorneqassallutik katsorsarneqassallutillu siornatigut Danmarkiliartaraluarput.

Periarfissaq atuukkallarmat, peqqinnissaqarfiup misissortinneq katsorsartinnerlu kisiat akilertarpaa, sinneri, soorlu angalaneq ineqarnerlu, nakorsiap nammineq akilertarlugit.

Kisianni taama ikiorsiineq peqqinnissaqarfiup siorna decembarimi unitsikkallaraa, nunatsinni nakorsat qullersaata Berit Bjerre Handbergip oqaatigaa.

- Arnat ilaat aammalu ilaqutariit tamanna nalaappassuk assut ajuusaarutigaarput, kisianni inatsisip qanoq paasisariaqarneranik sukkanerpaamik misissuivugut, nakorsat qullersaat Berit Bjerre Handberg taama oqarpoq.

Tassalu piumassuserinngisamik naartuneq ajuleqqasut ilaat, tassalu atortorissaarutit atorlugit arnap mannissaanik tiguseriarluni angutip peersaanik imertarfiusami minguerluakkami kinguaassaqalersitsineq, qanoq ikiorserneqartarnissaannik peqqinnissaqarfik maanna misissuivoq.  

Naartulernissamulli taama ikiortariaatiginngitsut ikorneqartaannassasut, nakorsat qullersaata erseqqissaatigaa.

Tassalu iisartakkat atorlugit mannissanik kaanngartitsinissaq illoqarfinni tamani periarfissaavoq.

Taavalu aamma angutip anisuuanik arnamut ikkussinissaq Ilulissani Nuummilu najugaqartunut periarfissaalluni.

Inatsimmillu nalilersuineq naammassippat, qanoq aalajangernissamut nunatta politiikerii apeqqutaaginnalissapput.

- Politikkikkut tulleriiaarisoqarnissaa atorfissaqartissavarput, akisussaaffiit suut uagut isumagissanerigut imaluunniit qanoq akisussaaffik kikkunnit tiguneqassanersoq, Berit Bjerre Handberg taama oqarpoq.

Misissuineq sapaatit akunnialuit qaangiuppata piariissasoq nakorsat qullersaata Berit Bjerre Handbergip naatsorsuutigaa.