Naalakkersuisut meerartaarsinnaanngitsunut akeqanngitsumik katsorsaaneq itigartinngilaat

Ungaavaqqap qiarpalunneranik tusarusuttunut qaammaterpassuarnili naartunerluni misissortinnernut ajalusoortuartartunut  aningaasatigut immaqa ikiorsiissutissaqalingajalerpoq.

Piumassuserinngisamimmi meerartaarsinnaanngitsut Peqqinnissaqarfiup akiligaanik Danmarkimut kinguaassiorsinnaanermut katsorsartikkiartortarnermik aaqqiissutip atuutilersinneqarnissaanut Naalakkersuisut akerliuissunngillat. 

- Aningaasat nassaarinissaannut Inatsisartut ikiuussinnaappata siunnersuutip tapersersornissaanut piareersimavugut, Mimi Karlsen (IA), peqqissutsimut naalakkersuisoq oqarpoq. 

AAMMA ATUARUK Kulunnguaq Jafetilu meerartaarusullutik 160.000 koruuninik atuisut

Piumassuserinngisamik meerartaarsinnaanngitsut kinguaassiornissamut pisortat akiligaannik katsorsaasarneq 2019-imili periarfissaajunnaarpoq.  
Neqeroorut unitsinneqarpoq inuit namminneerlutik timmisartumut billetsit Danmarkimilu najugaqarfissaq akilertussaammassuk – taamaalillunilu Kalaallit Nunaanni inuit tamarmik assigiimmik pineqarunnaarnerat tunngavilersuutigineqarluni. 

Meeraqanngitsut kingorna tusindterpassuarnik katersisussanngorsimapput. Katsorsaanerinnaq 50.000 koruuneqarpoq, tamatumalu qaavatigut billetsit, unnuinerit nakorsaatillu ilanngunneqassallutik. 

- Neqeroorut 2019-imi unitsinneqarmat uggornarpoq. Katsorsarneqarnissamummi neqerooruteqarsimavoq angalanermulli aningaasartuutit nammineq akilerneqassallutik. Tamannalu assigiinngisitsineruvoq. Billetsinummi akissalinnut taamaallaat neqeroorutaalerpoq. Aningaasallu pissarsiarinagit unitsinneqarpoq. Uggornaqaaq, Mimi Karlsen KNR-imut oqarpoq. 

- Naalakkersuisut periarfissaqarpat soorunami ikiuukkusuttorujussuupput. Meeqqammi tamaasa tikilluaqquagut.

Partiit tapersersuipput

Katsorsarneqarsinnaanerli pisortanit akilerneqaqqittalissasoq, Anna Wangenheim Demokraatineersoq isumaqarpoq. Angalaneq, misissortinneq najugaqarfissarlu Peqqinnissaqarfimmit aamma akilerneqassasoq, Demokraatit isumaqarput.

Partiilu kisimiinngilaq. Naleraq Siumullu neqeroorutip atuutilersinneqaqqinnissaanik siunnersuummut aamma akuersaarput. 

- Nunatsinni inuiaqatigiiarannguuvugut, taamaammat Naleqqami isumaqarpugut periarfissarsiussasugut. Periarfissarsiornitsinni killiliisoqassanersoq pillugu aappariit aningaasaqarnerat aamma isiginiartariaqarparput, Naleraq oqaaseqaammi oqarpoq. 

- Nunatsinni innuttaasut amerliartornerat arriippallaarpoq, taamaammat periarfissaq ammaffigisariaqarparput. Siunnersuut siuariartornermut tunngassuteqarpoq inatsisitigullu qulakkeerneqartariaqarluni, Siumut oqarpoq. 

Kulúnnguaq Petersen aamma Jafet Við Stein aappariipput ukiorpassuarni meerartaarniarsimasut. 2019 sioqqullugu kingornalu nammineq akiliillutik. Namminneq oqarnerattut ukioq manna 160.000 koruunit atorsimavaat. Danmarkimi marloriarlutik katsorsartikkiartoreersimapput – maannalu pingajussaanik aallarnissamut katersillutik.

Pingasoriarluni misiliinissamut katsorsartinnerinnaq 50.000 koruuneqarpoq. Aappariillu kissaatiginerpaasamik piviusunngortissinnaannginnerat ilungersunarpoq. 

- Ileqqaarpugut tassunga allamuunngitsorlu, Kulúnnguaq Petersen, ilinniartitsisuusoq oqarpoq.

Siunnersuut pingasoriarluni oqaluuserineqartussaavoq aappaagulu upernaakkut ataatsimiinnermi aappassaaneerneqassalluni.