Kinguaassiorsinnaanermut nakorsartinneq aningaasaqarnermut inatsimmi: Massakkut angalaneq aamma akilerneqartalissaaq

Peqqissutsimut naalakkersuisup Mimi Karlsenip naatsorsuutigaa 2024-p aallartinneraniit aappariit meeraqanngitsut nakorsartinneqarnissamut taperneqarsinnaalissasut.

Allattoq Hanna Vestergaard Hviid, Aviâja Kilime

aggustip 10-at 2023 14:06

Nutserisoq Per Rosing

2019-imi Kalaallit Nunaanni nammineq piumassuserinngisamik meerartaarsinnaanngitsunut IVF-imik aamma ICSI-mik nakorsartinnermut tapiissuteqartarneq unitsinneqarpoq. Nakorsartinneq Danmarkimi ingerlanneqartarpoq.

Neqerooruteqartarneq unitsinneqarpoq Danmarkimut timmisartumik angalanissaq ineqarnissarlu inuit nammineq akilertassammassuk – taamalu Kalaallit Nunaanni kikkut tamarmik naligiimmik pineqarsinnaannginnerat tunngavilersuutigineqarpoq.

Kisianni aningaasaqarnermut inatsit nutaaq allatut periarfissiivoq, tassami Danmarkimi kinguaassiorsinnaanermut nakorsartinnermut koruunit 8,7 milliuunit immikkoortinneqarmata, taakkununnga ilaapput angalaneq ineqarnerlu.

- Taamanikkut ajornartorsiutaavoq nammineq ineqarfissarsiortartussaagamik. Tassa imaappoq akissallit tassaapput nakorsartinneqarnissamut ikiorneqarsinnaasut. Aningaasaqarnermut inatsimmut siunnersuutikkut allanngortinneqarpoq tassaalersillugu peqqinnissaqarfiup iluani neqeroorutaasoq, taamaalineratigullu kikkut tamarmik naligiilissapput, peqqissutsimut naalakkersuisoq Mimi Karlsen (IA) oqarpoq.

Aamma atuarukAningaasanut inatsisissatut siunnersuut: Inuusuttunut, utoqqarnut peqqinnissaqarfimmullu aningaasat amerlanerusut

2023-mi inatsisartut upernaakkut ataatsimiinnerminni kinguaassiorsinnaanermut nakorsartinnissamut tapiissuteqartarnerup eqquteqqinnissaanut siunnersuut aappassaaneerpaat, taamalu timmisartumik angalaneq ineqarnerlu namminersorlutik oqartussanit aamma akilerneqartalissallutik.

Partiit tamarmik siunnersuut tapersersorpaat, taamaattumillu aningaasaqarnermut inatsisissatut siunnersuummi nutaami naalakkersuisut aningaasanik immikkoortitsipput.

- Inatsisartut aalajangigarimmassuk pinngitsoornani aningaasalerneqassaaq. Uagullu aningaasaqarnermut inatsisissatut siunnersuutigaarput tamatumunnga koruunit 8,7 milliuunit immikkoortinneqassasut, Mimi Karlsen oqarpoq.

KINGUAASSIORSINNAANISSAMUT NAKORSARTINNEQ

Inatsisartunut ilaasortaq Anna Wangenheim Demokraatineersoq 2022-mi ukiaanerani ataatsimiinnermi siunnersuuteqarpoq Namminersorlutik Oqartussat angalaneq, ineqarneq nakorsartinnerlu akilertassagaat piumassuserinngisamik meerartaarsinnaanngitsut Danmarkiliassagaangata IVF-mik aamma ICSI-mik nakorsartikkiartorlutik.

Peqqinnissaqarfiup naatsorsorpaa ukiut tamaasa aappariit 40 kinguaassiorsinnaanermut naakorsarneqarnissamut innersuunneqarsinnaassasut.

2019-mi naalakkersuisut aappariit 40 Danmarkiliartissallugit qanoq akeqassanersoq missiliorpaat. Ukiumut koruunit 6.000.000-ussasut missiliorneqarpoq.

Nakorsartinneq nammineq koruuninik 50.000-nik akeqarpoq.

Siullermeerneranut atatillugu peqqissutsimut naalakkersuisoq Mimi Karlsen oqarpoq, naatsorsuinerit nutaat takutikkaat Danmarkimi kinguaassiorsinnanermut nakorsartinnermik neqerooruteqarneq ukiumut koruuninik 8.750.000-inik akeqassasoq.

2023-imi upernaakkut ataatsimiinnermi Inatsisartut naalakkersuisunut piumasaqarput IVF- mik ICSI-mik nakorsartinnermut neqerooruteqarnermut aningaasanik nassaassasut angalaneq ineqarnerlu ilanngullugit peqqinnissaqarfiup akiligassaannik.

Aningaasaqarnermut inatsisissatut siunersuummi tamatumunnga koruunit 8,7 milliuunit immikkoortinneqarput.

Allisiguk

Peqqinnissaqarfiup naatsorsorpaa aappariit 40 ukiut tamaasa kinguaassiorsinnaanermut nakorsartinneqarnissamut innersuunneqarsinnaassasut.

Nakorsartinneq koruuninik 50.000-inik akeqarpoq

Mimi Karlsenip naatsorsuutigaa neqeroorut ukiup tullia aallartinniariarpat atortuulersinneqarsinnaassasoq. Tassa imaappoq ukiuni sisamani piumassuserinngisaminnik meerartaarsinnaanngitsut nakorsartinneqarnissaminnut tapiiffigineqarsinnaasimanngitsut.

Nakorsartinneq kisimi koruuninik 50.000-inik akeqarpoq, qaavatigullu billetsit, unnnuinerit nakorsaatillu.

Aamma atuarukKulunnguaq Jafetilu meerartaarusullutik 160.000 koruuninik atuisut

Kulunnguaq Jafetilu meerartaarusullutik 160.000 koruuninik atuisut

Taamaattumik Mimi Karlsenip nuannaarutigaa meerartaarsinnaanngitsut ikiorneqarsinnaangajalermata.

- Meerartaarsinaanngikkaanni ikiorneqarsinnaananilu misigissutsikkut attortisimanaqaaq artornarlunilu, taamaalillunilu ilaqutariippaalussuit meeraqalernermikkut nutarternissaminnut ikiorneqassapput, oqarpoq.

Aningaasaqarnermut Naalakkersuisup Naaja Nathanielsenip (IA), marlunngormat 2024-mut aningaasaqarnermut inatsisissamut siunnersuut saqqummiuppaa. Novembarimi akuersissutigineqassaaq.

IVF aamma ICSI-mik suliaritinnerit suuppat?

IVF kalaallisut mannissaq mannissaqarfimmit peerlugu qummuattaaqqami igalaaminermi pilersitsinertut taaneqarsinnaavoq.

ICSI anisooq pitsaanngeqigaangat imaluunniit IVF atorlugu siusinnerusukkut pilersitsinermi mannissat amerlanngissimagaangata atorneqartarpoq. ICSI-mik suliarinninneq peersami cellit ataasiakkaarlugit kapuummik mannissanut ikkunneqartarput.