Kim Kielsen Aleqa Hammond 2014-imi taarseramiulli siulittaasuulerpoq.Assi: KNR / Malik Brøns

Kim Kielsen siulittaasunngunngitsoq: Oqiliallannaq

Erik Jensen Kim Kielsen taarserlugu Siumumi siulittaasunngorpoq. Kielsen naalakkersuisuni siulittaasuuginnassaaq - pinngortitamiinnerulernissaminullu qilanaarpoq.

Erik Jensen Siumumi siulittaasunngorpoq.

Tamanna Siumup nuna tamakkerlugu sapaammi ualikkut ataatsimeersuarnerani siulittaasussamik taasinikkut aalajangerneqarpoq. Nuummi Hotel Hans Egedemi ataatsimeersuartoqarpoq.

Matumanilu Erik Jensen siulittaasumut 39-nit taaguunneqarluni ajugaavoq, Kim Kielsenilu 32-nit taaguunneqarluni.

Kielsen naalakkersuisuni siulittaasuuginnassaaq.

- Marlunnut avingajaqqasugut kisitsisit takutippaat. Siumumi taamaattoqassanngilaq. Siumut ataatsimoorfiussaaq. Nunaqarfiit, illoqarfiit illoqarfiillu anginerusut ataatsimoortissavagut. Tamanna pisussaaffigaarput, Kim Kielsen Erik jensenip siulittaasunngortutut oqaatigineqarnerata kingorna oqarpoq.

AAMMA ATUARUK Erik Jensen Siumumi siulittaasunngortoq

Kielsen Aleqa Hammondip kingorna 2014-imi partiimi siulittaasuulerpoq. Taannali partiimini nammineq aamma akerlerineqangaatsiarpoq. Inatsisartuni illuatungiliuttut tatiginnikkunnaarlutik oktobarimi suaaruteqarput. Tatiginnikkunnarnissamillu taasisoqarnissaa amerlanerussuteqalaartumik pingitsoortinneqarpoq: 14-it tatiginnittut 13-it tatiginninngillat marlullu taasinatik.

AAMMA ATUARUK Mystisk møde forud for debat om stenbidersagen

Siumumi siulittaasunngortoq, Erik Jensen Kielsenimut tatiginnikkunnaarnissamik taasinngitsunut marlunnut ilaavoq.

Siulittaasuujunnaarnerit ilinnut qanoq isumaqarpa?

- Oqiliallak. Taavatut aamma oqaatigerusuppara massakkut nuannarisannik tassa periarfissamik pissarsilerpunga, tassa pinngortitamiinnerunissara.

Susoqassanersoq piffissap takutissagaa

Kim Kielsen, anguniakkat angunnittoorpat, tassa siulittaasuunerit Siumumi annaavat. Tamanna qanoq oqaaseqarfigisinnaaviuk?

- Nuannaarutigivara. Uannut tapersuinikorpassuit aamma taakkua sinnerlugit tassani ilungersortarnikuuvunga. Tunniussinnaasara Siumumut tunniuttuaannarnikuuvara. Aamma angusat arlaqaalussimaqaat.

Maannakut siulittaasuujunnaarninnut tunngatillugu naalakkersuinikkut qanoq kinguneqassua?

- Inatsisartut ippassaanikkunni naammassipput, taava massakkut ukiamut ataatsimiinnissarput februarimi tullinnguuppoq. Soorunami tungaanut qanoq susoqarniarneranut tunngatillugu paasinarsissaaq, Kielsen oqarpoq, nangillunilu:

AAMMA ATUARUK Erik Jensen Siumumi siulittaasunngortoq: Tulluusimaarpunga

- Kisianni suliassarpassuaqarpugut aamma sanaartornerit annertuut unitsinneqassanngillat, inatsisartunut tunngatillugu suliassat aappassaanigassat pingajussaaniigassat unitsinneqannginnissaat soorunami nukikka tamaasa atorlugit Siumummut oqaatigigumaarpakka tamakkua.

Siumummi siulittaasuujunnaarninni tamanna isumaqassava qinersititsisoqarnissaa?

- Tamakkua massakkut oqaatigisinnaanngilagut. Massakkut Siumut siulittaasortaarpoq, taava siulersuisunngortussat ingeriarlutik oqaloqatigeeriarlutik apuussaqartussaassapput. Siumup ataaniippugut, siulersuisuunerit qullersaraagut, Kim Kielsen oqarpoq.

Siumumi siusinnerusukkut Siumut naalakkersuisuniinnerani partiimi siulittaasoq aamma naalakkersuisuni siulittaasuunnginnikuuvoq. Lars-Emil Johansen 1988-imit 1991-imut Siumumi siulittaasuuvoq Jonathan Motzfeldtilu namminersornerullutik oqartussani taamani siulittaasuulluni.

Naalakkersuisulli siulittaasuata partiimi aamma siulittaasuunissaa piumasaqaataanngitsoq, Ilisimatusarfimmi inuiaqatigiilerinermut ilisimatooq, Birger Poppel oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat