Erik Jensen Siumumi siulittaasunngortoq
Siumut nutaamik siulittaasortaarpoq. Erik Jensen partiip nuna tamakkerlugu ataatsimeersuarnerani siulittaasunngorniuunnermi toqqaanneqarpoq.
Tassunga Vivian Motzfeldt aamma maanna siulittaasuusimasoq, Kim Kielsen unammileertaagaluarput.
Kim Kielsenilu 32-nit taaguunneqarpoq, Erik Jensenilu 39-nit taaguunneqarluni ajugaalluni.
- Tapersersuisorpassuaqarnera isumalluarnarpoq. Taama tapersiisoqartiginera nuannerpoq, Erik Jensen oqarpoq.
Erik Jensenip Kim Kielsenip siulittaasuuneranit qanoq allaanerutigissanerluni erseqqissumik akissuteqarfiginngilaa.
Namminerli partiimut siulittaasutut Kim Kielsenip angusimanngisaanik partiimut katersuutsitsisinnaassasoraluni KNR-imut oqaatigaa.
- Isumaqarama massakkut alloriaqqittarialertugut. Nunarput ataatsimoortitsiviusumik, naalaarsinnaasumik katersuuffiusumillu siuttussaalatsivoq. Alloriaqqinnissamut pikkoriffikka piginnaasakkalu atorluarlugit Siumumi ilaasortat inuiaqatigiillu tamaasa ataatsimoortissinnaagakkit sassarninnut peqqutigaakka, Erik Jensen KNR-imut sapaatip-akunnerani matumani oqarpoq.
Siulittaasussamik naligiittumik taasisoqartoq
Taasinerit 71-it tamarmik sininneqarput. Taasinerillu pappiaqqamut allanneqartut karsimut pappimut issoraanneqarput.
Siulittaasussatut sassartut aqqi allaffissamut allattorneqarput, taasinerillu ataasiakkaarlugit karsimiit tiguneqartarlutik atuarneqarput, siulittaasunngorniartullu taaneqartup aqqata sanianut allanneqartarlutik.
AAMMA ATUARUK Erik Jensen: Nunarput ataatsimoortitsisinnaasumik siuttussaalatsivoq. Uanga sapiutinngilanga.
Taasinermi siullermi Erik Jensen 35-nit, Kim Kielsen 29-nit Vivian Motzfeldtilu arfineq-marlunnit taaguunneqarput.
Siumup malittarisassai naapertorlugit siulittaasunngortussaq 50 procentinit taaguunneqarsimassaaq. Partiip allattaa naapertorlugu Erik Jensen 49,3 procentinit taaguunneqarpoq taamaammallu siulittaasunngornissamut taasinermik ataatsimik amigaateqarluni.
Taamaammallu nutaamik taasisoqarnissaa pisariaqarluni, tassungalu taaneqannginnerpaaq ilaatinneqanngilaq. Tassanilu Vivian Motzfeldt peerneqarluni.
Siulittaasussamik qinerseqqinnissamut Erik Jensen Kim Kielsenilu kiserngorupput.
Taasisinnaatitaasut nutaamik taasiffissamik tunineqarput, nutaamillu taaseqqillutik.
Matumanilu Erik Jensen 39-nit taaguuneqartoq Kim Kielsen 32-nit taaguuneqarpoq.
Erik Jensenip Siumumi Kielsenimut isornartorsiuisunut ilaanera nalinginnaasumik ilisimaneqarpoq.
Kielsenip tunuarnissaa piumasarigaa
Erik Jensen ukiut marluk affaata ingerlanerani siulittaasuminut marloriarluni toqqaannartumik tunuppoq: Siullermik Inatsisartuni Atassut Kim Kielsenimut tatiginnikkunnaarnermik okotobarimi oqaaseqarmat.
Kim Kielsenimut tatiginnikkunnaarnermik tasinissaq amerlanerussuteqarfigineqarluni qaangerneqarpoq: Tassani amerlanerussuteqaqqarluinnartut Kim Kielsenimut tatiginnikkunnaarnissamut itigartitsipput: 14-it akuersipput, 13-it akerliupput marlullu taasinatik.
Erik Jensen siulittaasuminut tatiginnikkunnaarnissamik taasinissamut taasinngitsut marluk aapparaa.
Aappassaa siorna aggustimi pivoq. Erik Jensen siumumi ilaasortat arfineq-marluk Kim Kielsenip tunuarnissaanik piumasaqartut ilagaat.
Ilaasortat arfineq-marluk Kim Kielsenimut tatiginnikkunnaarlutik allagaqarpoq, Kielsenillu tunuarnissaa piumasaralugu.
Kim Kielsenip Siumut qineqqusaarnermi neriorsuutaanik politikkianillu immikkoortuni assigiinngitsuni ilaatigut aalisarnermi qilalukkanillu qernertanik pisassiissutinut atatillugu malinnginnera isornartorsiorlugu allappaat.
- Piffissami sivitsortumi partii Siumut ilumini imaannaanngitsumi ilungersunarluinnartumilu inissisimavoq, siulittaasup innuttaasunik kiisalu Inatsisartunut qinikkanik ataqqinninnginnera tusaajumananilu naaperiarfigineqarsinnaanngittarnera peqqutigalugu, allakkami allassimavoq.
Erik Jensen allakkami atsioqataanermini aatsitassaqarnermut suliffeqarnermullu naalakkersuisuuvoq. Taanna naalakkersuisunit siorna novembarimi tunuarpoq.
- Tassa ilisimaneqartutut assigiinngitsut pissutsit Siumup iluani aaqqiiviginiarlugit ilungersuuteqarsimavugut. aamaattumik tamakkua nalilersoreerlugit massakkut aalajangersimavunga pitsaanerusoq tunuaruma, Erik Jensen KNR-imut oqarpoq.
