Erik Jensen: Nunarput ataatsimoortitsisinnaasumik siuttussaalatsivoq. Uanga sapiutinngilanga.
Siumut tallimanngorpat kiisami ataatsimeersualissaaq. Partiilu siulittaasumik siulersuisunillu sapaatiuppat qinersissaaq.
Vivian Motzfeldt, Kim Kielsen Erik Jensenilu siulittaasunngorniuttuupput.
AAMMA ATUARUK Kielsen paatsuugassaanngitsumik oqartoq: Nunanit allanersunut politikkip tigunissaa piffissanngorpoq
Erik Jensen, sooruna Siumumut siulittaasunngorniarlutit sassarpit?
- Isumaqarama massakkut alloriaqqittarialertugut. Nunarput ataatsimoortitsiviusumik, naalaarsinnaasumik katersuuffiusumillu siuttussaalatsivoq. Alloriaqqinnissamut pikkoriffikka piginnaasakkalu atorluarlugit Siumumi ilaasortat inuiaqatigiillu tamaasa ataatsimoortissinnaagakkit sassarninnut peqqutigaakka.
Siumup ataatsimeersuarnissaa
- Siumut tallimanngorpat ataatsimeersualissaaq. Partiimeersut 70-it missaat Nuummi peqataassapput.
- Ataatsimeersuarnermi oqaluuserisassat naatsumik:
- Tallimanngorneq: Ataatsimeersuarneq workshoppernertalimmik ammarneqassaaq.
- Arfininngorneq: Partiip anguniagai pillugit oqallinneq.
- Sapaat: Oqallinneq, naatsorsuutinik saqqummiineq, siulittaasumik siulersuisunillu qinersineq.
- Ataatsimeersuarneq knr.gl-imi KNR2-kkullu toqqaannartumik sapaatiuppat ullukkut nalunaaqutaq ataatsimiit aallakaatinneqassaaq.
- Siulittaasumik qinersineq nunatsinni politikkikkut aqutsinermut pingaaruteqaqimmat, minnerunngitsumillu kina Naalakkersuisunut siulittaasuussanersoq ersertussaammat - ataatsimeersuarneq toqqaannartumik aallakaatinneqassaaq
- Uannut sullinnanga inuiaqatigiilli sulillugit peqatigiiffilerineq kattuffilerinerlu ukiorpassuarni uummateqarfigaara.
Siulittaasunngussagaluaruit Siumut qanoq allanngortikkusuppiuk?
- Isumaqarpunga tamanna ataatsimeersuarnermi ataatsimoorullugu eqqartorluassagipput. Suliniutit pingaarutilerujussuit sukarluillu sisamat (takornariartitsineq, aatsitassarsiorneq, inuussutissarsiorneq taavalu piniarneq aalisarnerlu) ineriartortinneqarnissaannut tunngasut ataatsimoorfigivagut. Timitaliisinnaassuserli suli annertunerusariaqarpoq. Isorliunerusuni inoqarfinnilu minnerusuni assigiinngitsutigut ineriartortitseqqinnerusoqartariaqartoq takusinnaagatsigu.
- Ukiuni kingullerni annertuumik aalassattoqartarpoq Siumut aalassakkaangat, nunarput tamarmi aalassattarpoq. Taanna qimattariaqalerparput, ataatsimoornissarput aatsaat taama pingaaruteqartigimmat tassuunakkullu uanga nukikka ataatsimoortitsinissamut atorniarlugit sassarpunga.
Siulittaasutut suut marluk pingaarnerpaatillugit sulissutigissavigit?
- Sanaartornerup siammarnerunissaanik suliniarnissaq pingaaruteqartorujussuusoraara. Namminiilivikkiartornermilu oqartussaaffiit tigusassagut piareersarneqarnerusariaqarput. Qularneq, nangiarneq massakkut atornagit, sapiissuserli immitsinnullu upperinerulluta alloriaqqinnissarput pingaarnertut suliassaraarput.
Siumumi isumaqatigiinnginnertalimmik aalassassimaartoqartarpoq. Siulittaasutut partii qanoq ataatsimoortissaviuk?
- Ataatsimooqqissaarnissarput pingaartuusoraara. Taamaammat siuttoqarnikkut allannguinissarput aallaavigalugu uanga siulittaasussatut sassarpunga.
AAMMA ATUARUK Kim Kielsen qineqqusaaruteqartoq: Nunaqarfinni inuusuttut internet atorlugu ilinniassasut
- Naalaassaanga, attavigiuminartuussaanga pikkoriffigisaralu, tassa avammut ersarissumik oqariartorsinnaaneq, atorluarusuppara. Katerititsisinnaavunga, unnussiuaartitsisinnaavunga allatigullu. Pikkoriffigisakkalu Siumumi massakkut pisariaqartinneqarsoraakka.
- Inuiaqatigiit aalassaqqajaanerat Siumup aalassaqqajaaneranik aallaavilik allanngortittariaqarparput. Siumumi amigaatigisatta, tassa toqqissisimaneq, tulluusimaarutiginninneq nuannaarnerlu, pilerseqqinnissaannut siuttoorusuppunga. Suliassarli tamanna kisima suliarisinnaanngilara. Siulersuisut Siumullu immikkoortortaqarfii suliassaq tamaat ataatsimoorullugu suliassarivaat.