Tusagassiuutit: Erik Jensen naalakkersuisuujunnaalerpoq
Aatsitassanut suliffeqarnermullu naalakkersuisoq, Siumumeersoq Erik Jensen, naalakkersuisutut tunuarpoq. Sermitsiaq.ag taama allaaserisaqarpoq, aamma Erik Jensenip tamanna KNR-imut uppernarsarpaa.
- Tassa ilisimaneqartutut assigiinngitsut pissutsit Siumup iluani aaqqiiviginiarlugit ilungersuuteqarsimavugut. Taamaattumik tamakkua nalilersoreerlugit massakkut aalajangersimavunga pitsaanerusoq tunuaruma. Ippassaq sisamanngornermi Siumup gruppia ilisimatippara ullumikkuminngaanniit atuutilersumik tunuarlunga, Erik Jensen KNR-imut taama oqarpoq.
AAMMA ATUARUK Siumumi avissaartuuttoqanngilaq
Erik Jensen Inatsisartuni ilaasortatut ingerlaannassaaq, aamma Siumumi siulittaasussatut sassarniarpoq.
- Siunniuteqqavara. Tassa taanna sulissutigissavara. Aamma angussaqqaarpara. Taanna upperaara, naalakkersuisuni maanna ilaasortaasimalersoq taama oqarpoq.
- Uanga arrajasuujunngilanga aamma tunniutiinnajasuujunngilanga. Kisianni aamma soorunalimi suna tamarmi killissaqarsinnaasarpoq. Taamaattumillu massakkut pitsaanerutippara unneqqarillunga sulinissaq pingaartikkakku Naalakkersuisuniit tunuaruma.
Kielsenip tunuarnissaanut piumasaqaqataasoq
Erik Jensen Kim Kielsenimut aggustip qaammataani sakkortuumik isornartorsiuillutik allagaqartut arfineq-marluusut ilagaat. Taakkuami taamani isumaqarput Kim Kielsen siulittaasutut tunuartariaqartoq.
Taamani Kim Kielsen arlalitsigut Siumup qineqqusaarutaanik aamma politikkianik - ilaatigut aalisartagartassiissutinut aamma qilaluartassiissutinut malinninnginnerarlugu isornartorsiorneqarpoq.
Allakkat Siumup immikkoortortaqarfiinut tusarniaassutigineqarput, Kielsenilli isornartorsiorneqarnera immikkoortortaqarfinnit ilalerneqanngilaq. Taamanimi immikkoortortaqarfiit arfinillit kisimik isornartorsiuinernut tapersiipput, ilaatigut Siumut nutaamik siulittaasortaartariaqartoq oqariartuuteqarlutik.
AAMMA ATUARUK Immikkortortaqarfiit aalajangiipput: Kim Kielsen siulittaasuuginnassaaq
Kisianni immikkoortortaqarfiit 34-t isummerput Kielsen siulittaasutut ingerlaqqittariaqartoq, taamaalilluni Kielsen taamani uppisinneqanngitsoorpoq.
Erik Jensenili isumaqarpoq pisuutitsiniaasoqartariaqanngitsoq.
- Isumaqanngilanga pissusissamiissasoq tikkuartuunnermik imaluunniit avissaartuutsitsiniaanermik nipeqalersitsiniaaneq. Ataatsimoornissarput nukittunerunissarpullu suleqataaffigerusullugu aalajangernera aamma tunngaveqarpoq, Erik Jensen oqarpoq.
KNR-imit Siumup siulittaasua Kim Kielsen oqaaseqartinniaraluaratsigu iluatsinngilarput.