Siulittaasup tullia karl Kristian Kruse (talerpilleq) siuttut ataatsimiinnerisa kingorna tusagassiortunik katersortitsinermi.

Immikkortortaqarfiit aalajangiipput: Kim Kielsen siulittaasuuginnassaaq

Kim Kielsen Siumumi siulittaasuuginnassaaq. Tusagassiortunik katersuutsitsinermi Siumup allaffeqarfianiit taama nalunaarutigineqarpoq.

Kim Kielsen Siumut-mi siulittaasutut ingerlannaassaaq.

Siumumi immikkoortortaqarfiit 60-t taama aalajanngiipput. Immikkkortortaqarfiit  Kim Kielsen siulittaasutut ingerlaannassanersoq imaluuniiit immikkut ittumik siulitaasumik qinersiviusumik ataatsimeersuartoqassanersoq aperineqarsimapput.

Immikkoortortaqarfiit kingusinnerpaamik tallimanngormat akissutitik tunniutereersimasussaavaat, ullumilu ullo’qeqqata siornatigut Siumumi siuttuusut akissutaasut ataatsimiissutigaat.

Piviusut

Siumup immikkoortortaqarfiit 61-iupput. 

Siulittaasup tullia Karl Kristiasn Kruse naapertorlugu immikkoortortaqarfiit qulingiluat piffissaliussaq qaangiutsinnagu attaveqarfigineqarsinnaasimanngillat.

Immikkoortortaqarfiit 12-it attavigineqaraluarlutik piffissaliussaq naatinnagu akinngillat. 

Immikkoortortaqarfiit 40-t tusarniaaneq akissuteqarfigaat. 

Taakkunannga arfinillit siulittaasoq tatiginangu nalunaarput. Siulittaasumik tatiginninnginneq 34-t isumaqatiginngilaat.

60-init 40-t akisimapput, 40-nillu taakkunannga 34-t akipput Kim Kielsen tapersersorlugu. Taamaattumik siulitaasutut nangikkallaassaaq.

- Immikkoortortaqarfiit 34-t siulittaasup taarserneqarnissaa isumaqatiginngilaat. Taamaattumik immikkut ataatsimeersuartoqarnissaq pissutissaqanngilaq, siulitaasup tullia Karl Kristian Kruse partiit siuttuisa ataatsimiinnerisa kingornatigut oqarpoq.

- Siulittaasup tusagassiuutini politikkikkut suliniutit pillugit ersarinnerunissaanik aamma kissaateqartoqarpoq, Karl Kristian Kruse oqarpoq.

Siulittaasussatut allamik qinigassanngortittoqanngilaq

Siumumit Inatsisartuni ilaasortanit quliusunit arfinillit Kim Kielsen siulittaasutut allagaqarlutik tunuaqquammassuk, suliaq aallartippoq. Aamma naalakkersuisoq Erik Jensen tunuaqqusissummut atsioqataavoq.

Erik Jensenip saniatigit Inatsisartut aningaasaqarnermut akileraartarnermullu ataatsimiititaliaata siulittaasua Hermann Berthelsen, inatsisartunilu ilaasortat Anders Olsen, Nikkulaat Jerimiassen, Henrik Fleischer, Laura Taunajik kiisalu Jens Danielsen atsioqataapput.

Kim Kielsenip Siumup qineqqusaarutai politikkialu malinngikkai ilaatigut isornartorsiuutigineqarpoq, ilaatigut aalisagartassiissutit qilalugartassallu pillugit isornartorsiuisoqarluni.

AAMMA ATUARUK Isornartorsiuisut ataatsimiinnerup kingorna: Isumarput suli attapparput

Siumulli siulersuisuunerisa Kim Kielsen siulittaasuuginnartussatut tapersersorpaat, immikkoortortaqarfiilli amerlanerussuteqartut kissaatigippassuk, immikkut ittumik ataatsimeersuarnermut siulittaasumik nutaamik toqqaarfiusinnaasumut aggersaasoqassaaq.

Siumup siulittaasussaatut qinersinissamut pisortatigoortumik suli qinigassanngortittoqanngilaq.

Kim Kielsenip nalinginnaasumik 2020-mi aasakkut ataatsimeersuarnermi siulittaasutut qinigassanngortinniarnani paasissutissiissutigereerpaa.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat