Kielsenimut isornartorsiuisup Erik Jensen Siumumi siulittaasussatut taperseraa
Siumumi siulittaasussamik sapaatiuppat toqqaasoqassaaq. Siumumi ilaasortat pingasunik qinigassaqarput: Tassa Erik Jensen, Vivian Motzfeldt kiisalu maanna siulittaasuusoq Kim Kielsen.
Erik Jensenilu parteeqatiminik Anders Olsenimit tapersersorneqarpoq. Tamanna Anders Olsenip ippassaq nalunaarutigaa.
- Erik Jensen siulittaasussatut piukkunnerpaasutut taperserusullugu siunnerfeqarpunga, tusagassiuutinut nalunaarummi allappoq.
Siumup ataatsimeersuarnissaa
Siumut tallimanngorpat ataatsimeersualissaaq. Partiimeersut 70-it missaat Nuummi peqataassapput.
Ataatsimeersuarnermi oqaluuserisassat naatsumik:
Tallimanngorneq: Ataatsimeersuarneq workshoppernertalimmik ammarneqassaaq.
Arfininngorneq: Partiip anguniagai pillugit oqallinneq.
Sapaat: Oqallinneq, naatsorsuutinik saqqummiineq, siulittaasumik siulersuisunillu qinersineq.
Ataatsimeersuarneq knr.gl-imi KNR2-kkullu toqqaannartumik sapaatiuppat ullukkut nalunaaqutaq ataatsimiit aallakaatinneqassaaq.
- Suminngaanneeraluaraannimi Erik Jensen-ip qanimut tusarnaarsinnaanera, tunuliaquttanik kikkuugaluartunulluunniit akuutitsisarnera inuppalaarneralu minnerunngitsumillu ataatsimoortitserusunnera assortugassaanngitsut Siumumi amigaatigisarsimagatsigit.
Siumumi ilaasortat arfineq-marluk Kielsenip tunuarnissaa piumasarisimavaat
Anders Olsen Siumumi Kim Kielsenimut tapersersuisunut ilaanngilaq.
Taanna Siumumi ilaasortat arfineq-marluk Kim Kielsenip siulittaasutut tunuarnissaanik siorna aggustimi kissaateqartut ilagaat.
Taakku arfineq-marluk Kielsenimut tatiginnikkunnaarsimapput, Kielsenillu tunuarnissaa kissaatigalugu allagaqarput.
AAMMA ATUARUK Siumup immikkoortortaqarfii peqataatitsinerusumik siulittasoqarumasut
Kim Kielsenip Siumut qineqqusaarnermi neriorsuutaanik politikkianillu immikkoortuni assigiinngitsuni ilaatigut aalisarnermi qilalukkanillu qernertanik pisassiissutinut atatillugu malinnginnera isornartorsiorlugu allappaat.
- Piffissami sivitsortumi partii Siumut ilumini imaannaanngitsumi ilungersunarluinnartumilu inissisimavoq, siulittaasup innuttaasunik kiisalu Inatsisartunut qinikkanik ataqqinninnginnera tusaajumananilu naaperiarfigineqarsinnaanngittarnera peqqutigalugu, allakkami allassimavoq.
Erik Jensen naalakkersuisunit tunuartoq
Allakkami atsiortut tassaapput Anders Olsen, Nikkulaat Jeremiassen, Henrik Fleischer, Erik Jensen, Laura Táunâjik, Jens Danielsen aamma Hermann Berthelsen.
Atsiortunit arfinillit Siumup Inatsisartuni gruppiani ilaasortaapput – atsiortullu arfineq-aappassaat Erik Jensen aatsitassaqarnermut suliffeqarnermullu naalakkersuisuulluni.
Erik Jensen naalakkersuisunit siorna novembarimi tunuarpoq.