Siumut Inatsisartuni ilaasortaatitat amerlanerussuteqartut Kim Kielsenip tunuarnissaanik piumasaqarput
Naalakkersuisooqatigiinni partii Siumut iluminni ulluni kingullerni aporaaffiuvoq.
Isumaqatigiinnginneq tamanut saqqummiunneqarpoq, Inatsisartuni Aningaasaqarnermut Akileraartarnermullu Ataatsimititaliap siulittaasua Hermann Berthelsen Siumut, illuatungiliuttut peqatigalugit piumasarimmassuk Ilullissani Nuummilu mittarfiit sanaartorneqarnissaannut atsioqatigiinnissaq unitsinneqassasoq.
Isumaqatiginnginneq ataasinngornermi unnukkut annertusivoq.
Partii Siumumi ilaasortat nuimanerit arfineq marluk tusagassiuutinut allagaqarlutik, ataasinngornermi unnukkut, piumasaraat Kim Kielsen partiimi siullittaasutut tunuassasoq.
Politikerit isumaqarput Inatsisartuni qinersinissamik suaaruteqanngikkaluartoq tunuarsinnaasoq.
Siumut Inatsisartuni ilaasortaatitaanni quliusuni taakkunannga arfinillit Naalakkersuisunullu Ilaasortaq Erik Jensen ilanngullugu siulittaasup tunuarnissaanik piumasaqarlutik atsiortuupput.
Piffissami sivitsortumi partii Siumut ilumini imaannaanngitsumi ilungersunarluinnartumilu
inissisimavoq, siulittaasup innuttaasunik kiisalu Inatsisartunut qinikkanik ataqqinninnginnera
tusaajumananilu naaperiarfigineqarsinnaanngittarnera peqqutigalugu. Tamannalu
attanneqarsinnaanngilaq, Siumumi ilaasortat arfineq marluk tusagassiuutinut naluaaruteqarlutik taama allaapput.
Siumumi ilaasortat arfineq marluk tusagassiuutinut nalunaaruteqarnerminni pisassiissutit agguarneqartarnerat eqqaavaat.
Isumaqatigiinngissutigineqarnerat pillugu Kim Kielsen siusinnerusukkut ataatsimeeqatiginiarneqarsimagaluarpoq isumaqatigiinngissutigineqartoq paasineqassammat tamannali kinguneqarsimanngilaq.
Tunuaqqusinissamik piumasaqarluni ammasumik allagaq, Siumut partiivini siulersuisuunernut aamma Siumut immikkoortortaqarfiinut tamanut nassiunneqartoq, Naalakkersuisunut ilaasortamit Erik Jensenimit aamma inatsisartut aningaasaqarnermut akileraartarnermullu ataatsimiititaliap siulittaasuanit Hermann Berthelsenimit, kiisalu inatsisartunit ilaasortanit Anders Olsenimit, Nikkulaat Jerimiassenimit , Henrik Fleischerimit, Laura Taunajimmit kiisalu Jens Danielsenimit atsiorneqarpoq.