Assi: KNR / Malik Brøns

Siumup immikkoortortaqarfii peqataatitsinerusumik siulittasoqarumasut

Siumumi siulittaasunngorniuttoqalerpat ilaasortat kina qinerniarerlugu oqaatigerusunngilaat.

Nunatsinni partiip annersaanni Siumumi ilaasortat siulittaasumut sapaatiuppat qinersissapput.

Ataatsimeersuarneq ulluni pingasuni sivisussuseqartoq Siumup siulittaasussaanik qinersinermik naggaserneqassaaq.

Siulittaasussatut sassartut tassaapput Erik Jensen, Vivian Motzfeldt Kim Kielsenilu.

AAMMA ATUARUK Ilisimatooq: Siumut nutaamik siulittaasoqaleraluarpalluunniit nunarput nutaamik siuttoqalertariaqanngilaq

Taakkulu siulittaasutut imminnut partiip immikkoortortaqarfiisa aallartitaannut qineqqusaartussaapput.

Najugaqarfiit tikinneruneqarlik

Siulittaasup suna piginnaasarisariaqarneraa Sisimiuni immikkoortortaqarfimmeeersup Hans-Kristian Petrussenip nalornissutiginngilaa.

- Inuk ataatsimoorfiusoq, tusarnaarsinnaasoq paasinnissinnaasorlu. Qularnanngitsumik Vivian Motzfeldt Erik Jensenilu unammingaatsiarnissaat pissanganarpoq. Taakkua qineqqusaarutissaat assut pissanganarpoq. Hans-Kristian Petrussen KNR-imut oqarpoq.

Siumup ataatsimeersuarnissaa

 

Siumut tallimanngorpat ataatsimeersualissaaq. Partiimeersut 70-it missaat Nuummi peqataassapput.

 

Ataatsimeersuarnermi oqaluuserisassat naatsumik:

 

Tallimanngorneq: Ataatsimeersuarneq workshoppernertalimmik ammarneqassaaq.

 

Arfininngorneq: Partiip anguniagai pillugit oqallinneq.

 

Sapaat: Oqallinneq, naatsorsuutinik saqqummiineq, siulittaasumik siulersuisunillu qinersineq.


Ataatsimeersuarneq knr.gl-imi KNR2-kkullu toqqaannartumik sapaatiuppat ullukkut nalunaaqutaq ataatsimiit aallakaatinneqassaaq. 

Taassuma Kim Kielsen siulittaasutut qinerneqaqqinnissaa qularaa. Aqutsineratami nalaani eqqissiviilliornerit inuillu nittartakkatigut naapittarfiini isummersornerinit qinigaaqqinnissaata ilimanaateqarunnaarneranut ersiutaasut taanna oqarpoq.

Partiip politikiata oqallisigineqarnerani Siumup immikkoortortaqarfii peqataatinneqarnerusariaqartut taanna aamma isumaqarpoq.

Qaerngâq Nielsen Siumup Siorapalummi immikkoortortaqarfianeersoq tamatumunnga isumaqataavoq. Taassuma siulittaasutut sassartut qineqqusaarutaat Siumup qullersaqarfianut noqqaassutigisaraluarpai, ataasiinnaalli qineqqusaarutai pisimavai.

- Eqeersimaartuussaaq aamma qinersisartut isumaannik tusarnaartarnissaa pisariaqarpoq. Tikissinnaanngikkuni atortorissaarutit atorlugit paasiniaasarnissaa kissaatigissavarput, Qaerngâq Nielsen oqarpoq.

Thiiooq Knudsen Paamiut Siumumeersuuvoq. Taassuma kina siulittaasussatut qinissanerlugu aalajangereersimagaluarlugu oqaatingerusunngilaa. Siulittaasorli ima ittuussaaq.

- Siulittaasumi pingaartipparput inuk eqeersimaartoq. Aamma politikikkut siunnerfiit Siumup anguniagaanut attuumassuteqarluinnartut taakku pingaartittarpagut, taanna oqarpoq.

Silarlunnera akimmisaarfiusinnaasoq

Siulittaasunngorniunnermi qineqqusaarneq Siumup Nuummi immikkoortortaqarfiani naammagisimaaneqarpoq.

Siumut Nuuk sapaatiummat Nuummi ilaasortanut qaaqqusivoq, tassani siulittaasutut sassartut qineqqusaartinneqarlutik.

- Qujanartumik siulittaasussatut sassartut piffissami kingullermi imminnut ilisaritillutillu sunik anguniangaqarnerlutik saqqummiisimammata, piffissap nalliliivinnerani nittarsaassinerit eqqarsaataallu tusarnikuullugit pissarsiaqarnarsimavoq, Inga Dóra Guðmundsdóttir Markussen oqarpoq.

Sinerissami sila ullut kingulliit anorleqattaarpoq, ataatsimeersuarnermi peqataasussat ilaat taamammat tikinngitsoorsinnaallutik. Siulittaasumulli qinersinissamut tamanna aporfiussanngilaq.

AAMMA ATUARUK Siumut Nuuk sapaatiuppat nereqatigiinnissamut qaaqqusisoq – Kielsenili allanik pilersaaruteqartoq

Ataatsimeersuarnermi oqarasuaatikkut peqataasoqarlunilu siulittaasumut qinerseqataasoqarsinnaasoq, Siumup allattaa Miki Jensen KNR-imut paasissutissiivoq. Taamaaliornikkut ilaasortat apeqquteqarsinnaallutillu oqalliseqataasinnaassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat