Ilisimatooq: Siumut nutaamik siulittaasoqaleraluarpalluunniit nunarput nutaamik siuttoqalertariaqanngilaq
Siumumi laasortat partiimi kina siulittaasuutikkusunnerlugu sapaatiuppat toqqassavaaat. Kim Kielsen 2014-imili siulittaasuulerpoq. Kingullermik siulittaasumut qinersisoqarmat Kim Kielsenip Vittus Qujaukitsullu akornanni 2017-imi unammisoqarpoq.
Siumut nuna tamakkerlugu ataatsimeersuarnissaa
Siumut nuna tamakkerlugu ataatsimeersuarnera tallimanngornermi aallartissaaq. Partiimit ilaasortat 70 procentit missaanniittut peqataassapput..
Partiip ataatsimeersuarnissaanut pilersaarut naatsumik oqaluttuaralugu:
Tallimanngorneq: Nuna tamakkerlugu ataatsimeersuarneq nunap immikkoortuani siulersuisuinit workshopeqartitsinermillu ammarneqassaaq.
Arfininngorneq: Partiip anguniagai siunnersuutaasussarlu pillugit oqallinneq.
Sapaat: Oqallinneq, naatsorsuutit saqqummiunnerat, siulittaasumik siulersuisunillu taasineq.
Kim Kielsen siulittaasunngorpoq Vittus Qujaukitsorlu partiimi ukiuni 28-ni ilaasortaareerluni tunuarpoq. Taassuma partii nutaaq, Nunatta Qitornai taarsiullugu pilersippaa.
Tamatumuuna siulittaasutut qinigassanngortittut pingasuupput, tassaallutik Kim Kielsen, Vivian Motzfeldt aamma Erik Jensen.
Inatsisartuni amerlanerussuteqartut aalajangiisartut
Inuiaqatigiilerinermut ilisimatuup, Birger Poppelip oqarnera naapertorlugu Kim Kielsen partiimi siulittaasunngorniarnermi ajorsassaguni tamanna Naalakkersuisuni siulittaasutut tunuartariaqarneranik isumaqanngilaq.
Inatsisartuni amerlanerussuteqartut Naalakkersuisut siulittaasussaannik toqqaasarput, Kim Kielsenilu siulittaasusut toqqagaareernikuuvoq.
Taassumami siulitttaasuujunnaarnissaanut suliaqangaatsiartoqaqqaassaaq, imaluunniit Kim Kielsen nammineerluni qinersinissamik suaaruteqassalluni, Birger Poppel oqarpoq.
- Naalakkersuisut siulittaasua apeqquserneqanngikkuni tatiginnikkunnaarnermilluunniit taasisoqanngikkuni siulittaasuuginnarsinnaavoq. Naalakkersuisut siulittaasuata partiimini siulittaasuunissaanik piumasaqaateqanngilaq.
- Siumimi siulittaasut taarserneqarnera Naalakkersuisut siulittaasoqarfianut kinguneqartariaqanngilaq.
Partiimi siulittaasut marluk
Kim Kielsenimut tatiginnikkunnaarnermik taasisoqarneranik inerneqassagaluaruni tamanna Inatsisartunut nutaamik qinersisoqarnissaanik aamma isumaqassaaq, tamannalu illuatungiliuttut kissaatigissagaat Birger Poppelip qularutigaa. Siumut, Demokraatit, Nunatta Qitornaaluunniit qinersinissamik kissaateqarpasinngillat.
Siumup partiiani nutaamik siulittaasoqalissagaluaruni Kim Kielsenilu Naalakkersuisuni siulittaasuuginnarluni tamanna partiimit aatsaat nalaanneqarnavianngilaq.
Taamaattoqareernikuusormi, Birger Poppel oqarpoq.
- 80-ikkut naajartornerannut utertoqarsinnaavoq, Lars-Emil Johansen Siumumi 1988-imit 1991-imut siulittaasuuvoq, Jonathan Motzfeldtilu taamani Namminersornerullutik Oqartussani siulittaasuuvoq.
- Qanoq annertutigisumik aporaattoqarsimanersoq imaluunniit aporaattoqarsimanersoq oqaatigisinnaanngilara.
Siumup malittarisassai naapertorlugit siulittaasunngorniarnermi ajugaanissamut minnerpaamik 50 procentinit taasisoqassaaq.