Erik Jensen Siumumi siulittaasunngortoq: Tulluusimaarpunga
Erik Jensenip nunatsinni partiimi annerpaami Siumumi siulittaasunngornissaata aalajangerneqarnissaanut ataatsimeersuarnermi aappassaanik taasisoqaqqaartariaqarpoq.
Taamaalillunilu Kim Kielsen naalakkersuisunut aamma siulittaasuusoq partiimi ukiuni arfinilinni siulittaasooreerluni uppisinneqarpoq.
Kim Kielsen 32-nit taaguunneqarpoq, taannalu siulittaasunngoqqinnani Erik Jensenimit 39-nit taaguunneqartumit taarserneqarpoq.
AAMMA ATUARUK Erik Jensen Siumumi siulittaasunngortoq
- Soorunami qamanngavik uummammik pisumik tapersersuisunut tunuliaqutsiisunut qujassutissaqaqaanga aamma attortisimaqaanga, minnerunngitsumik aamma ukua suleqatigisimasakka qujassutissaqarfigeqaakka, Erik jensen KNR-imut siulittaasussamik taasinerup kingorna oqarpoq.
Taasinermi nalingiingaatsiartoqarpoq. Kim Kielsen 32-nit taaguunneqarpoq illillu 39-nit. Taakku 32-t Kielsenimullu tapersersuisut sinneri illit siulittaasuussallutit eqqortoq qanoq taakkununnga uppernarsassaviuk?
- Naatsorsuutigaara tamat oqartussaaqataanerat amerlanerussuteqartullu qinersinerat taanna ataqqineqassasoq, taamaattumillu Siumup ataatsimoornissaa aamma taanna oqariartuutigisimasara naatsorsuutigaara ataqqineqassasoq pisussaaffiliivoq ataatsimeersuarnerup qullerpaartaa taamatut aalajangernera ataqqineqartussaavoq, taamaattumik inuiaqatigiit kalaallit ataatsimoornissaat aamma Siumukkut ataatsimoornissaat suliarissallugu siuttuuffiginissaanut piareersimavunga.
Maanna ataatsimuussaagut
Siulittaasutut suliassanni suna siulliua pingaarnerpaavalu?
- Ataatsimoornissarput. Ikioqatigiinnissarput, minnerunngitsumillu aamma immikkoortortaqarfiit, Siumukkormiut, Inatsisartut gruppi, Naalakkersuisut, borgmesterit tamaasa qanimut suleqatigalugit timitalersorneqarnissaat taanna tullinnguutissavarput.
Siumumi maanna siulittaasuuvutit, Kim Kielsenilu Naalakkersuisunut siulittaasuulluni. Taanna siulittaasorisinnaaviuk?
- Taanna Inatsisartut aalajangertarpaat kina naalakkersuisuussanersoq kikkut naalakkersuisuussanersut taamaattumik una partiimut tunngasoq naammassivoq, taava Inatsisartut immikkoorput. Taamaattumik aamma ukiut siuliini misilittakkat aallaavigalugit taamatut immikkut partiimi siulittaasoqarluni kiisalu Naalakkersuisuni siulittaasoqarluni immikkoortillugit ingerlasoqartarnikuuvoq, aamma taanna Siumukkut sapinngilaat. Kisianni soorunami takujumaarparput piffissami tulliuttumi takujumaarparput qanoq ingerlajumaarnersoq, uanniinngilaq taanna arsaq, kisianni soorunami siulittaasuusimasorlu oqaloqatigeeqqaalaassaagut.
AAMMA ATUARUK Erik Jensen: Nunarput ataatsimoortitsisinnaasumik siuttussaalatsivoq. Uanga sapiutinngilanga.
Motzfeldtip politikkikkut siulittaasumut tullersortaalersoq
Siumumi siusinnerusukkut Siumut naalakkersuisuniinnerani partiimi siulittaasoq aamma naalakkersuisuni siulittaasuunnginnikuuvoq. Lars-Emil Johansen 1988-imit 1991-imut Siumumi siulittaasuuvoq Jonathan Motzfeldtilu namminersornerullutik oqartussani taamani siulittaasuulluni.
Naalakkersuisulli siulittaasuata partiimi aamma siulittaasuunissaa piumasaqaataanngitsoq, Ilisimatusarfimmi inuiaqatigiilerinermut ilisimatooq, Birger Poppel oqarpoq.
AAMMA ATUARUK Kielsenimut isornartorsiuisup Erik Jensen Siumumi siulittaasussatut taperseraa
Vivian Motzfeldt politikkikkut siulittaasumut tullersortaalerpoq, Erik Jensenillu ”marluullutik suleqatigiilluarnissartik” naatsorsuutigaa.
Kingullermik siulittaasumut qinersisoqarmat Kim Kielsenip Vittus Qujaukitsullu akornanni 2017-imi unammisoqarpoq.
Kim Kielsen siulittaasunngorpoq Vittus Qujaukitsorlu partiimi ukiuni 28-ni ilaasortaareerluni partiimit tunuarpoq.
Taassuma partii nutaaq, Nunatta Qitornai taarsiullugu pilersippaa.
