Nipisattassiissutit pillugit oqallinnissaq sioqqullugu eqqumiitsumik ataatsimiittoqartoq
Inatsisartut ataatsimiittarfiani oqaaseqartarfimmit Partii Naleqqap siulittaasua, Hans Enoksen sisamanngornermi unnukkut politikkikkut tupatsitsingaatsiaqaaq.
- Arfininngormat aqqarnup qeqqalersoq sianerfigineqarpunga Inatsisartunut ilaasortat sisamat uppititsiniaallutik Siumukkormiut qanoq iliornissaminnik ilitsersuunneqarnissaminnik kissaateqartut, Hans Enoksen oqarpoq.
KNR-ip Hans Enoksen tassunga tunngatillugu itisileeqquaa:
Nipisattassiissutinut suliaq pillugu naatsumik:
- Nipisattassiissut siorna aalisarneqanngitsut 204 tonsit 2020-mut nuutsinnissaat Naalakkersuisut maajip ulluisa aqqaneq-aappaanni aalajangerpaat.
- Kalaallit Nunaanni Aalisarnermut Nakkutilliisoqarfiup paasissutisiinera naapertorlugu ammaasseqqinneq politikkikkut aalajangerneruvoq.
IA: Kim attuumassuteqarpallaarpa?
- Inuit Ataqatigiit suliaq pillugu avammut nalunaaruteqaqqaarput.
- Kim Kielsen umiatsiaminik aalisartumut atukkiussereerluni Naalakkersuisuni nipisattassiissutinik qaffaaqataagami imminut iluaqutissinnersoq pillugu apeqquteqarniarlutik nalunaaruteqaramik taamaattoqarpoq.
- Kim Kielsen Naalakkersuisut ataatsimiinnerannut peqataavoq, attuumassuseqarsinnaallunilu paasissutissiissutiginagu.
Kukkunersiuinermut ataatsimiititaliaq sakkortuumik uparuaasoq
- Inatsisartut Kukkunersiuinermut ataatsimiititaliaa tamatuma kingorna suliamut atatillugu nalunaajaanerminik tunniussaqarpoq.
- Ataatsimiititaliallu matumani "sakkortuumik uparuaaneq" atorpaa pissutsillu "isornarluinnartutut" erseqqissaatigalugit.
- Kukkunersiuinermut ataatsimiititaliap oqaaseqarsinnaaneranik sakkortunerpaamik uparuaaneruvoq.
- Oqaluuppaatigut Kim Kielsen tassa qatsutiivipparput pissaanerminik atornerluiinnavippoq uagullu tassa maannakkut aalajangerpugut uppitinneqassasoq uagut taaseqataanata imaluunniit akerliulluta taasissaagut. Sunaaffa salloqittarluta pissusilersortut, Hans Enoksen KNR-imut oqarpoq.
AAMMA ATUARUK Kim Kielsenimut tatiginnikkunnaarnissaq amerlanerussuteqaqqarluinnartut itigartikkaat
Inuit Ataqatigiit siulittaasuata, Múte Borup Egedep oqarnera naapertorlugu taanna Siumumi ilaasortanit nuiumasunit arfininngornermi aamma sianerfigineqarpoq.
- Attavigineqarpugut oqariartorfigineqarluta illuatungiliuttut Naalakkersuisut siulittaasuannut tatiginnikkunnaaraluarpata peqataaniarlutik naalakkersuinikkut nikittoqartariaqalerneranik oqariartuuteqarlutik, Múte Borup Egede KNR-imut oqarpoq.
Kikkunukua?
- Sianertuni ippassaq taaseqataanngitsut marluk peqataapput, taakkualu saniatigut aamma Nikkulaat Jerimiassen aamma Vivian Motzfeldt.
Múte Borup Egedep Siumumi ilaasortat taasinngitsut innersuussutigisai tassaapput Erik Jensen aamma Henrik Fleischer.
Illuatungiliuttut siulittaasuata oqarnera naapertorlugu taakku Kim Kielsenip Naalakkersuisut siulittaasuata qanoq ililluni uppisinneqarsinnaanera paaserusuppaat.
Isertortumik ataatsimiinnissaq aaqqissuunneqartoq
Oqarasuaatikkut oqaluunnerit sianertoqarnerata aqaguani sapaammi oktobarip ulluisa sisamaanni ataatsimiittoqarneranik kinguneqarpoq. Ataatsimiinneq taanna Partii Naleqqap allaffiani pivoq.
Ataatsimiinnermi Partii Naleqqamit Hans Enoksen, Inuit Ataqatigiinnit Múte Borup Egede aamma Siumumit Erik Jensen aamma Nikkulaat Jeremiassen peqataapput. Múte Borup Egedep Hans Enoksenillu oqarnerat naapertorlugu Siumumi ilaasortat peqataasut marluk Siumumit ilaasortat sisamat naalakkersuinikkut nikittoqarnissaanik kissaateqartut sinnerlugit peqataallutik oqaatigaat.
Ataatsimiinnermi peqataanngitsut marluk tassaapput Vivian Motzfeldt aamma Henrik Fleischer.
Tatiginnikkunnaarnermut taasititsinissamut Siumukkormiut taakkua namminneq siunnersuuteqarpat?
- Uagut illuatungiliuuttut ippassaq qaqitsisuuvugut, kisianni taamaliortoqarnissaanik siunnersuuteqaqataapput, Múte Borup Egede oqarpoq.
Siumumi ilaasortat oqaaseqarusunngitsut
Erik Jensenip illuatungiliuttullu ataatsimiittoqarsimanerarneqarnera KNR-imut oqaaseqarfigerusunngilaa.
- Oqaaseqarfigissanngilara, taanna oqarpoq.
Nikkulaat Jeremiassenip ataatsimiittoqarsimanera KNR-imut uppernarsarpaa, sunali oqallisigineqarsimanersoq oqaatiginagu.
- Politikkerit akornanni qaqugukkulluunniit oqaloqatigiissinnaajuaannarput aamma kaffisorujoortoqartuaannarsinnaavoq takinerunngilaq, Nikkulaat Jeremiassen oqarpoq.
AAMMA ATUARUK Siumumit marluk Kielsenimut tatiginnikkunnaarnissamik taaseqataanngitsut
Inuit Ataqatigiit Partii Nalerarlu salluppat?
- Naamik. Sallusutut oqaatingerusunngilakka aamma allanik oqaasissaqanngilanga, eqqartuussaarusunngilanga, taanna akivoq.
Vivian Motzfeldtip ataatsimiinneq uppernarsarusunnagulu uppernarunnaarsinnianngilaa, KNR-illu aperigamiuk oqaasissaqarnani.
Henrik Fleischerip Inatsisartut ataatsimiittarfiata avataani susoqarsimanera oqaaseqarfigerusunngilaa. Illuatungiliuttullu oqaatigisaat oqaaseqarfiginiarnagu.
Kim Kielsenimut tatiginnikkunnaarnissaq itigartitsissutigineqartoq
Inatsisartuni politikerit nipisattassiissutinut tunngatillugu suliaq sisamanngornermi akunnerni arfinilinni oqallisigaat. Inuit Ataqatigiit, Atassut, Suleqatigiissitsisut Partii Nalerarlu Naalakkersuisut siulittaasuannut Kim Kielsenimut (Siumut) tatiginnikkunnarlutik nalunaaqutaq unnukkut qulingiluanngunngitsiartoq oqaatigaat.
Siulittaasumut tatiginnikkunnaarnermik oqaaseqaateqarneq ikinnerussuteqarfiulluni itigartitsissutigineqarpoq. Naalakkersuisut siulittaasuannut tatiginnillutik taasisut 14-iupput, 13-illu tatiginninnatik.
Aleqa Hammondillu (NQ) tatiginnikkunnaarnermik taasinissamik pinngitsoortitsiniarluni siunnersuuteqarpoq, naalakkersuisooqatigiillu (Siumut, Nunatta Qitornai Demokraatillu aaqq.) Kim Kielsenimut suli tatiginninnerarlugit.
- Nutaamik qinersisoqarnissaanut piffissaanngilaq, Aleqa Hammond oqarpoq.
Atassut Suleqatigiissitsisulluunniit Siumumit ilaasortanit sisamanit assinganik sianerfigineqanngillat.
