Siumumit marluk Kielsenimut tatiginnikkunnaarnissamik taaseqataanngitsut
Inatsisartut nipisattassiissutinut suliaq sisamanngornermi ataatsimiinnerminni nalunaaquttap akunnerini arfinilinni oqallisigaat.
Inuit Ataqatigiit, Suleqatigiissitsisut aamma Partii Naleqqap Naalakkersuisut siulittaasuannut, Kim Kielsenimut (S) tatiginnikkunnaarnertik nalunaaqutaq qulingiluanngorluinnalersoq nalunaarutigaat.
Nipisattassiissutinut suliaq pillugu naatsumik:
- Nipisattassiissut siorna aalisarneqanngitsut 204 tonsit 2020-mut nuutsinnissaat Naalakkersuisut maajip ulluisa aqqaneq-aappaanni aalajangerpaat.
- Kalaallit Nunaanni Aalisarnermut Nakkutilliisoqarfiup paasissutisiinera naapertorlugu ammaasseqqinneq politikkikkut aalajangerneruvoq.
IA: Kim attuumassuteqarpallaarpa?
- Inuit Ataqatigiit suliaq pillugu avammut nalunaaruteqaqqaarput.
- Kim Kielsen umiatsiaminik aalisartumut atukkiussereerluni Naalakkersuisuni nipisattassiissutinik qaffaaqataagami imminut iluaqutissinnersoq pillugu apeqquteqarniarlutik nalunaaruteqaramik taamaattoqarpoq.
- Kim Kielsen Naalakkersuisut ataatsimiinnerannut peqataavoq, attuumassuseqarsinnaallunilu paasissutissiissutiginagu.
Kukkunersiuinermut ataatsimiititaliaq sakkortuumik uparuaasoq
- Inatsisartut Kukkunersiuinermut ataatsimiititaliaa tamatuma kingorna suliamut atatillugu nalunaajaanerminik tunniussaqarpoq.
- Ataatsimiititaliallu matumani "sakkortuumik uparuaaneq" atorpaa pissutsillu "isornarluinnartutut" erseqqissaatigalugit.
- Kukkunersiuinermut ataatsimiititaliap oqaaseqarsinnaaneranik sakkortunerpaamik uparuaaneruvoq.
Amerlanerussuteqaqqarluinnartut Kim Kielsenimut tatiginnikkunnaarnissamut itigartitsipput: 14-it akuersipput, 13-it akerliupput marlullu taasinatik.
Inatsisartuni taaseqataanngitsut marluk tassaapput, Siumumit Erik Jensen Henrik Fleischerilu. Taakku Kim Kielsen parteeqatigaat.
Henrik Fleischer, taaseqataannginninnut suna peqqutaava?
- Suliamik ingerlatsineq tamaat malinnaaffigeqqissaarpara. Tamanna inersuarmilu qallorneqartut tunngavigalugit taama aalajangerpunga, Henrik Fleischer oqarpoq.
Kielsen killilimmik taperseraa
Kim Kielsen nipisattassiissutinik amerlileeqataagami suliamut attuumassuteqarpallaarsimanersoq suliami pineqarpoq, taamaalineranimi umiatsiani aalisartumut attartortippaa.
Illua tungiliuttut Kim Kielsen attuumassuteqarpallaarsorisimavaat. Kielsenilu allagaatinik Kukkunersiunermut Ataatsimiititaliamut suliamik qulaajaasumut tunniussaqarsimanngitsoq, illua tungiliuttut aamma isumaqarput.
Naalakkersuisoqatigiit Kim Kielsen attuumassuteqarpallaarsimasorinngilaat. Suliamullu tunngatillugu inatsisinik aamma unioqqutitsisimasorinngilaat.
AAMMA ATUARUK Nipisattassiissutinut suliap isornartorsiorneqarneranut oqallinneq sakkortooq: Unikkallartariaqarpugut
Henrik Fleischerili akuerseqataananilu itigartitsinngilaq. Taannami isumaqarpoq, Kim Kielsen suliamut tunngatillugu allatut iliuuseqarsimasariaqaraluartoq.
- Taamaammat Kim Kielsenimut tapersiinera killeqarpoq, taanna oqarpoq.
- Kim Kielsenip umiatsiaata Imarsiornermik Aqutsisoqarfimmit aalisariutitut akuerisaanikuunnginnera, inuttaanik tatiginnikkunnaartoqarnissaata oqallisigineqarnera allagaatillu amigaataanerat pillugit Inatsisartuni sisamanngormat oqallisigineqarnerat akuerseqataanangalu itigartitseqataanngilanga.
Erik Jensen, taaseqataannginninnut suna peqqutaava?
- Isumaqarpunga Kukkunersiuinermut Ataatsimiititaliap nalunaarusiaa tunngavisariaqarluinnaripput. Kukkunersiuinermut Ataatsimiititaliamut siulittaasuunera tunngavigalugu taama aalajangerpunga, Erik Jensen KNR-imut oqarpoq.
- Tamatuma saniatigut allagaatit tunniunneqanngillat. Tunniunneqassanersut takujumaarparput. Tamanna qanoq inerneqarumaarnersoq pissanganarpoq, tassanngaanniit ingerlariaqqittoqarniassammat.
Allagaatit maanna utaqqisaasut
Suliaq pillugu sivisuumik oqallinneq – tatiginnikkunnaarnermik oqariartuuteqarnerup saniatigut – allamik aamma inerneqarpoq. Tassa Kukkunersiuinermut ataatsimiititaliap nipisattassiissutinut tunngatillugu suliamik misissuinermini allagaatit Naalakkersuisunit pissarsiarisinnaanngisani pissarsiarisussanngorpai.
Suliaq marloriarlugu misissorneqarpoq. Siullermik Naalakkersuisut nammineerlutik misissuisitsineranit eqqartuussissuserisut suliffeqarfiata, Poul Schmithip misissuiffigaa. Tamatuma kingorna Kukkunersiuisut ataatsimiititaliaat septembarip ulluisa arfineq-aappaanni piareertumik nalunaaruteqarput. Taannalu isornartorsiuineruvoq.
Ataatsimiititaliaq ”sakkortuumik uparuaallunilu” suliap ilai ”isornartortutut” taavai. Tamanna kukkunersiuinermut ataatsimiititaliap oqaaseqarsinnaanerani sakkortunerpaamik uparuaaneruvoq.
Allagaatit taakkorpiaat pingaaruteqarnerannut peqqutaasoq paasilluarniagassaalaarpoq: Tassami isornartuusutut kukkunersiuinermut ataatsimiititaliap tikkuagaasa ilaat tassaavoq, allagaatit Naalakkersuisunit piumasatik tigusimanngimmatigit.
AAMMA ATUARUK Nipisattassiissutinut suliaq: Illuatungiliuttut Kielsenimut uparuaaneq Inatsisartuni oqallisigisileraat
Ataatsimiititaliap allagaatit, naalakkersuisoqarfimmi sulinermi atukkat, taavalu eqqartuussissuserisoqarfimmik Poul Schmithimik allaqatigiittarermit pappialaatit pisarsiarisimanngilai. Allagaatit taakkua marluk allagaatinik takunnissinnaatitaanermut ilaanngitsut, Naalakkersuisut siulittaasuata Naalakkersuisoqarfiata ilisimatitsissutiginikuuaa.
Pappialani taakkunani suna allassimanersoq, Inasisartunut ilaasortat ilisimanngilaat.
Aalisarnermut, piniarnermut nunalerinermullu ataatsimiititaliap Henrik Fleischerip siulittaasuuffigisaata nipisattassiissutinut suliamut atatillugu allagaatit ilaat aamma piumasimagaluarpai iluatsinngitsumilli.
Henrik Flerischerip oqarnera naapertorlugu allagaatit marluk pineqarput. Allagaatip aappaa Naalakkersuisut nipisattassiissutinik qaffaaniarnermut allagaavoq. Allagaatip aappaa eqqartuussissuserisoqarfimmut Poul Schmithimut sumik misissuinissamut suliakkiinermut allagaavoq.
- Ataatsimiititaliami ilaasortat ilaat allagaatinik Naalakkersuisunut noqqaanerannut isumaqataallungalu tapersiivunga, Henrik Fleischer oqarpoq.
Naalakkersuisut siulittaasuat taperserpiuk imaluunniit tapersinngiliuk?
- Allagaatit amigaataasut tunniunneqarnissaannut isumaqataavunga. Tunniunneqareerpata taaseqataajumaarpunga, qilanaarpungalu.
