Kielsenimut isornartorsiuisut: Tatiginneqqilerpugut
Siumup gruppiani Inatsisartunut ilaasortat arfinillit naalakkersuisunilu ilaasortap ataatsip siulittaasuminnut Kim Kielsenimut tatiginnikkunnaarlutik augustip qiteqqutilersoq avammut nalunaarmata. Ataatsimeeqatigeereernerulli kingorna allanngortoqarpoq:
- Tassanilu silaannaq salinneqarpoq, Siumup siulittaasuanut Kim Kielsenimut tatiginnikkunnaartut sinnerlugit oqaaseqartartoq Nikkulaat Jerimiassen oqarpoq.
AAMMA ATUARUK Kielsenimik isornartorsiuisut tapersersuineq pillugu: Siulittaasortaarnissaq suli qilanaaraarput
Kim Kielsenip Siumumi siulittaasutut tunuarnissaa inatsisartunut ilaasortat arfinillit naalakkersuisunullu ilaasortap ataatsip maajimi atsioqatigiinnerat augustimi nutaarsiassaqarfinnut anngunneqarpoq. Taakku oqariartuutaat paatsuugassaanngilaq:
- Tusaaneqarusunneq. Suliassat assigiinngitsut eqqarsaatigalugit taanna gruppip iluani saqqummiunnikuuarput. Kisiannili ippassaq ippassaanilu taanna isumaqarpunga pingaarutilerujussuarmik aammalu Siumut nukittunerulluni ingerlaqqinnissaanut aamma pingaarutilerujussuarmik ataatsimiittugut, Nikkulaat Jerimiassen oqarpoq.
AAMMA ATUARUK Kielsen ullut 16-it nipangersimareerluni isornartorsiuisunut akissuteqartoq
Ataatsimiinnermi silaannaq salinneqartoq
Siumumit Naalakkersuisunut Inatsisartunullu ilaasortat marlunngormat pingasunngormallu ataatsimeeqatigiipput. Tassani illuatungeriit oqaloqatigiilluarsimasut Siumup gruppiani siulittaasoq oqarpoq.
- Tamatsinnut, illuatungeriittut paaseqatigiiffiusumik naammassinera isumaqarpunga uagutsinnut aammalu inuiaqatigiinnut toqqissisimanartumik naammassisutut oqaatigineqarpoq kukkunerunngitsoq, Siumumi siulittaasup tullia Karl-Kristien Kruse oqarpoq.
AAMMA ATUARUK Siumup immikkoortoqarfiisaa Kim Kielsen saqqumilaarneroqquaat
Siulittaasortik tatigeqqilerpaat
Isumaqatigiiffigalugulu ataatsimoorfigisaat ataasiuvoq:
- Ataatsimoornitsinni isumaqatigiissutigisarput tassaavoq nunap inuiaqatigiillu ingerlanneqarneranni ataatsimoorluta sulissuugut, Karl-Kristian Kruse oqarpoq.
Tatiginnikkunnaarsimasullu Siumumi siulittaasuminnut tatiginneqqilersimapput.
- Aappimik naamimilluunniit akitilaarusuppakkit. Kim Kielsen siulittaasutut taakkua isornartorsiuisut sinnerlugit tamaasa tatigeqqilerpisiuk?
- Soorlu oqartunga; Silaannarmik saliisoqarpoq. Taannalu aappimik akisinnaavara, Nikkulaat Jerimiassen oqarpoq.
AAMMA ATUARUK Immikkortortaqarfiit aalajangiipput: Kim Kielsen siulittaasuuginnassaaq
Tatiginnikkunnaarlutik atsioqatigiittut oqaaseqartartuat Anders Olsen sulinngiffeqarallarami ataatsimeeqataanngilaq.