Kielsen ullut 16-it nipangersimareerluni isornartorsiuisunut akissuteqartoq
Politikkerit nuimasut arfineq marluk taaassuma partiimi siulittaasutut tunuarnissaa aggustip aqqaneq aappaanni piumasaraat.
Isornartorsiuisut isumaqarput, Kielsen saqqumilaanngippallaartoq naalakkersuinikkullu ingerlatsinermini tunualiaqutiminik peqataatitsinngippallaartoq. Naalakkersuisullu aalisarnermut piniarnermullu politikkiat isornartorsiorneqarpoq, naalakkersuisut killilersuiniarpallaarnerarlugit.
Partiimi eqqissiviilliorneq ataasinngormat killiffeqarpoq, immikkoortortaqarfiit amerlanerussuteqartut tusarniaanermi siulittaasuuinnarnissaa kissaatigimmassuk. Immikkoortoqarfiit arfinillit Kim Kielsenip siuttuunera naammalernerarpaat.
Kim Kielsenip tapersersorneqarnini nuannaarutigaa, isornartorsiuisullu oqaloqatigissallugit neriorsuilluni:
- Oqariartuutiginikuuara uanga soraarsitsineq aqqutissatut isiginagu, periarfissanilllu naaperiutissanik ujartuisariaqarpugut, Kim Kielsen oqarpoq.
Taassuma partiimi Siumutut angitigisumi isummat assigiinngissinnaasarnerat erseqqissaatigaa.
- Tassa Siumumi amerlavugut taamaammat tupinnanngilaq, kisianni aamma oqarsinnaavunga inuiaqatigiit salliutillugit sulisariaqarpugut, taanna pingaarnerpaajutittariaqarparput. Imminut inuttut ataasiakkaatut soqutigisavut tunulliutilaarlugit inuiaqatigiinnut sassarnikuuvugut - taakkua sullikkumallugit aamma naalakkersuisooqatigiit isumaqatigiissutaat najoqqutaralugu suliat ingerlappavut, Kim Kielsen KNR-imit pingasunngornermi apersorneqarluni oqarpoq.
Isornartorsiuisulli nipangernissaat naatsorsuutigisinnaanngilaa. Isornartorsiuisummi siulittaasumik tapersersorneqarneranut qanoq isummissanerlutik suli nalunaanngillat:
- Naalakkersuisuni siulittaasuussagaanni minnerpaamik 16-inik inersuarmi kisitsisariaqarpugut
taannalu anguneqarsinnaanngippat taava nalilersuineq tullinnguutissaaq.
Kim Kielsen nalakkersuisoqatigiinni ikinnerussuteqartuni Nunatta Qitornaasa peqataaffigisaanni Demokratillu ikorfartugaanni siuttuuvoq, tassanilu suleqatigiinneq pitsaasuunerarpaa.
- Taamaattorli aamma oqaatigerusuppara periarfissanik assigiinngitsunik ujartuinermi partiit allat suleqatiginissaat imaluunniit allat tigullugit - aamma periarfissat ilagivaat qinersititsinissaq, Kim Kielsen oqarpoq.
Kim Kielsenip piffissaanngitsukkut qinersinissaq toqqassagaluaruniuk sassaqqinniarluni aamma oqaatigaa.
