Kangaamiormiut Maniitsumut nioqqutissarsiniartariaqartarput

Pilersuisoq pilersuinngitsoq ullo'qeqqanut radioavisimi oqaatigaarput. Neriniartarfiuteqarlunilu unnuisarfiutillit nioqqutissanik amigartoortuaannaleraangamik allatut ajornartumik 70 kilometerit missaannik isorartutigisoq atorlugu sukkasuuliamik Maniitsuliartariaqartarput. Aatsaalli silagikkaangat. Regine Filemonsen ima oqarpoq:

-Akisuvoq umiatsiap orsersornera, pisiaqarluarsimatilluta aamma taxartariaqartaratta, taamaalilluni akisugaluartoq pisisartugut ajunnginnerusumik atugaqarnissaat eqqarsaatigalugu Maniitsumut amigaatit pisiariartortarpagut.

-Tassa pilersaaruteqareertarpugut sila ajunngippat aallassalluta meeqqagut qimattuartarpagut atuarfimmiinneranni – nassuiaateriarlugit amigaateqaratta allatut ajornartumik Maniitsumut pisiniapallattariaqarluta.

Regine Filimonsenip uiatalu nioqqutissat atugassatik nalinginnaanerusut Pilersuisumi siumungaaq inniminnertaraluarpaat, iluatsittuaannanngitsumik.

Naatitat, naatsiiat, qajuusat, seqquluttut, iffiat, iffiat-qaqortut, equutissiat assigisaallu amigaataasartutut eqqaaneqarput.

Kangaamiuni Pilersuisumi niuertoq Kristian Lyberth oqarpoq, nioqqutissaarutinnginnissaq siunertaralugu toqqaannartumik Danmarkimut piniartarlutik. Piniakkatillu qaammatip aappaa affaq qaangiukkaangat tigusinnaasaritik. Tikinngitsoortarneranulli sila arlalitsigut akornusersuisuusarnerarpaa:

-Februaarip aallaqqaataanit sulilerninniit nioqqutissat maannakkut tikerartut eqqarsaatigalugit soorunami uku ilumoorsinnaapput. Siulii pisut, kisianni massakkut nioqqutissanik oqarsinnaavugut amigaateqarpallaarata.

Innuttaasummi oqarput tikittoqarmat kingullermik imerpalasut kisiinnangajammik tikisinneqartut? Aperaarput.

-Qajuusakkut, seqquluttut tamakku amigaataasut tassani aamma immiaaqqat sodavandillu tikimmata, qerisut aamma iffiugassat tikipput.

Amigaatisili tamakkersimanngillat?

-23-ni Johanne Christinemut tikittussaagaluarput, kisianni silap ajornera pissutigalugu aatsaat 27-ani nioqqutissat tikipput. Taava caontainerit sisamat ulikkaarussimallugit nioqqutissanik imallit. Aatsaat ullumi (30.marts 2007) taavunga ingerlassaaq, nioqqutissat sinneri apuutissallugit.

Kristian Lyberth Maniitsumit taama oqarpoq.

Neriorsuutigaattaaq Kangaamiuni Pilersuisoq-p nioqqutissanik pilersuinera siunissami pitsaanerulerumaartoq.