Nannup saassussinera: Tyskip aallaannginnermini nanoq qimaatinniaqqaaraluaraa
Paarsisut nannup tungaanut siullermik suaartarput, illuinnarsuullu atorlugu tungaanut eqqarlutik. Nanoq angummillu taava aatsaat saassussereersoq paarsisunit toqunneqarpoq. Nutaarsiassaqartitsivik NTB taama allaaserisaqarpoq.
- Suaartartoqarpoq, tungaanullu eqqartoqarluni, tamannali iluaqutaanani. Ole Jakob Malmo, politeeq, Svalbardimi oqartussat siuttuata sysselmandip ataani sulisoq oqarpoq.
Angut Tysklandimeersoq umiarsuarmi takornariartaammi sulisoq nannumit saassunneqarpoq, nanorlu paarsisunit aallaaneqarpoq toqunneqarluni.
AAMMA ATUARUK Tyskeq nannumit Svalbardimi saassutsittoq
Takornariat angallanneqarnissaat piareersarneqalersorlu nanoq saassussivoq. Ole Jakob Malmo taama oqarpoq.
Nannup toqunneqarnera assigiinngitsunit isornartorsiorneqarpoq. Tv-qarfik CNN taama allaaserisaqarpoq. Uumassusilerituup USA-meersup Jeff Corwinip nannup toqunneqarnera aliasuutigaa:
AAMMA ATUARUK Nanoq sermersuarmi ilisimatusartunut uippallertitsivoq
- Nunarsuarmi nannut 25.000-iinnanngornerat eqqarsaatigalugu nannup aallaaneqarluni toqunneqarnera ajuusaarnarpoq, Jeff Corwin, CNN-imut oqarpoq.
Umiarsuarmi takornariartaammi sulisut imminnut illersorniarlutik nanoq aallaasariaqarsimagaat, umiarsuaatileqatigiiffiup tusagassiutinut nalunaarutigaa.
AAMMA ATUARUK Piniarnermut nakkutilliisoq nannumit saassunneqangajalluinnartoq