Johannes Groth assammik arsarnermi angutit nuna tamakkerlugu sungiusaasorilerpaat
Assammik arsarnermi tusaamasarsuit Mikkel Hansen aamma Nicola Karabatic nunarsuarmi pissartanngorniarlutik ilungersoruttulersoq kalaallit assammik arsartartut kattuffiat TAAK VM-mut annguteriarsinnaanissamut piareersalerpoq.
Assammik arsarnermi ataatsimoorfimmut tikikkumaneqaqisumut aqqutissiuussisussatut siornatigut nunanut allanut unammisartoq Johannes Groth toqqarneqarpoq. Taanna aamma siornatigut arnanut nuna tamakkerlugu sungiusaasuuvoq.
TAAK-mi siulersuisut tamarmiusut Johannes Groth toqqarlugu siornatigut sungiusaasuusumut Johan Zanottimut taarsiitippaat.
AAMMA ATUARUK Nunarput arnat assammik arsartartut VM-imut anngunniunnissaannut aaqqissuisuussasoq
- Assammik arsarnermi misilittakkanik ulikkaarpoq, aammalu maanna aqutsinermik misilittagaqarlualerluni. Taamatuttaaq inuunermi ingerlaarnermini aamma maanna misilittagaqarluarmat maanna isumaqarpugut qajannaalluarlunilu piareerluaqqasoq angutinut sungiusaasuunissaminut, TAAK-mi siulittaasoq Carsten Olsen, Johannes Grothitut unammisartutut VM-ip naggataarnerani peqataareersoq oqarpoq.
Sisorartartoq assammik arsarnermut ilannguppoq
Suliariniagaa 2007-mi Tysklandimi VM-rtoqarnerata kingorna angoqqinneqanngilaq.
- Tamannalu aamma peqatiiffinnut ingerlateqqinneqassaaq. Iliuusissarpullu ersarippoq, ukiuni aggersunilu suliassagut nalunngilagut. Taamaaleriarpallu Johannes Groth-ip suleqatinilu inuusuttuni nunani allanut sungiusaasut suleqatigalugit siunissami arsariaaserisassarput ersarissassavaat, tamannalu aamma peqatigiiffinni ingerlanneqarluni unammisartut siunissami piareersimaffigereerniassammassuk, TAAK nalunaarpoq.
Unammisartut timikkut piginnaasaqarluarnissaat nutaaliornikkut anguniarneqarpoq unammisat 100 kilo sinnerlugu oqimaassusillit asserlugillu qaangeriarneqartartussaammata.
Siornatigut sisoraaserluni oqilaniunnermi ukiuunerani OL-qataasoq Martin Møller timikkut sungiusaasutut toqqarneqarpoq.
- Aamma nuannaarutigeqaara Martin Møller suleqatigissagakku, aammattaaq ukiorpassuarni tagiartuisartorput Berit Duus aamma suli suleqataarusummat, Johannes Groth oqarpoq.
