Nunarput arnat assammik arsartartut VM-imut anngunniunnissaannut aaqqissuisuussasoq
Nunarput arnat assammik arsartartut VM-imut 2023-mi juunip sisamaata aqqarngatalu akornanni anngunniunnissaannut aaqqissuisuunissamut akuerineqartoq, Timersoqatigiiffiit Assammik Arsartartut Kattuffiat, TAAK, ilisimatitsivoq.
Tassa nunatsinni arnat assammik arsartartuisa nunanut allanut unammisartui VM-imut nunatsinni, tassa Nuummi timersortarfissuarmi Inussivimmi, anngunniunnissamut qilanaarsinnaanngorput.
AAMMA ATUARUK Assammik arsarnermi arnat VM-mut anngunniunnissaannut Nunarput aaqqissuisuujumavoq
TAAK-illu siulittaasuata, Carsten Olsenip, tamanna nuannaarutigaa.
- Aaqqissuisuunissarput nuannaarutigeqalugulu pissanngatigeqaarput, taanna oqarpoq.
Amerikap avannaani Caribiamilu assammik arsartartut kattuffiat, NACHC (National America and Caribbean Handball Confederation), TAAK-ip nunatta arnat assammik arsartartut VM-imut Nuummi anngunniunnissaannut aaqqissuisuunissaanut siorna decembarip aallartinnerani qinnuteqaataanik akuersisuuvoq.
Nunat VM-imut nunatsinni anngunniuteqataassussat arfinillit arfineq-pingasullu akornanniissangatinneqarput, ilaatigut soorlu Puerto Rico, USA, Cuba soorunamilu nunarput taakkununnga ilaapput.
- Nunatsinnut anngunniarusuttoqaqaaq. Qujanartumik. Nunatta soqutigineqarluarnera nuannaarutigaarput. Tamannali anngunniunnerup sakkortunerunissaanik aamma kinguneqarsinnaavoq.
Arnat nunagisami anngunniuterngaassasut
Nunatsinni arnat assammik arsartartut nunanut allanut unammisartui VM-imut nunagisami anngunniuterngaartussanngorput.
Arnat VM-imut Mexicomi 2021-mi anngunniunneranni iligiit sisamaapput. Nunatsinneersut taamanikkut anngunniunnerminni ajorsaramik VM-imut anngutinngitsoorput.
AAMMA ATUARUK Arnat VM-mut Nuummi anngunniussinnaanerat qanilliallappoq: Kommune aningaasaleeqataajumavoq
Amerikap kujataaneersut Amerikallu avannaaneersut peqataaffigisaannik Panamerikamiut Nuummi timersortarfissuarmi Inussivimmi 2018-imi pissartanngorniummata, nunatsinni angutit assammik arsartartuisa nunanut allanut unammisartui nunagisami aamma anngunniupput. Nunatsinneersut taamanikkut pissartanngorniunnermi normu 4-nngoramik VM-imut anngutinngitsoorput.