Assammik arsarnermi arnat VM-mut anngunniunnissaannut Nunarput aaqqissuisuujumavoq
Ilimanarluarpoq Nuummi timersortarfissuarmi Inussivimmi aappaagu juni nuannisarluni nilliasoqarluarumaartoq. Unammiffimmi malinnaaffigineqartut tassaassapput arnat assammik arsartartut Amerikap avannaamiut Caribiamiullu.
Tassami assammik arsartartut kattuffiat TAAK allakkatigut qinnuteqarpoq VM-mut arnat anngunniunnissaat aappaagu junimi aaqqissuisuuffigiumallugu.
Amerikap avannaani Caribiamilu assammik arsartartut kattuffiat qinnuteqaammut decemberip qeqqani akissuteqassaaq.
- Aalajangerneq nuannerpoq Kalaallit Nunaannilu assammik arsartarnermut pingaaruteqarluni, TAAK-mi siulittaasoq Carsten Olsen KNR-mut oqarpoq.
- Ukiorpassuarni arnat sinnattorisarpaat Nunatsinni VM-mut anngunniussinnaanissartik. Taamaattumik Kalaallit Nunaanni assammik arsartarnermut aalajangernerput annertoorujussuuvoq, Carsten Olsen oqarpoq.
Angutit assammik arsartartut 2018-mi Nuummi VM-mut anngunniunneq misigivaat Panamerikamiut pissartanngorniunnerat Inussivimmi pimmat Amerikap kujataamiut avannaamiullu peqataasoralugit.
Nuannisartut nukittorsaatitut
Nunat tamalaat kattuffiini allanngortiterisoqarnikuuvoq Amerikap avannaamiut Caribiamiullu immikkut Nunarput peqatigalugu kattuffeqalerlutik.
Arnallu assammik arsartartut qularinngilaat Nuummi anngunniunneq nukissanik pissarsiffiujumaartoq.
- Isiginnaartut nipiliorlutillu tapersersuisut pitsaasumik uagutsinnut sunniunnissaat ilimanarluinnarpoq, arnat assammik arsarnermi nunanut allanut unammisartut anføreriat Ivaana Holm KNR-mut oqarpoq.
Arnat nunanut allanut unammisartut nammineq unammiffimmi VM-mut anngunniussinnaaneq iluminni aamma eqqartortarpaat.
- Nunanut allanut unammisartut Facebookimi ilutsinni qupperneqarpugut. Tassani eqqartortarparput nammineq unammiffimmi unamminissaq qanoq issanersoq. Kaammattoqatigiilluta nukissanik tunioraqatigiittarpugut, Ivaana Holm oqarpoq.
Assammik arsartartut kattuffiat maanna suliniummut aqutsisussanik pilersitsilerpoq taakkulu aaqqissuussineq minnerunngitsumillu aningaasaliisussarsiorneq aqussavaat.
TAAK nalunaarpoq aqutsisussat arnaannarnik inuttaqassasoq nunat tamalaat unammisarneranni aaqqissuussisuuffigisarnerannilu misilittakkat tunngavigalugit toqqarneqartussat.
Naatsorsuigallarnerit malillugit aningaasartuutissat 14 aamma 18 millioner koruunit akornanniissapput. TAAK aamma ilimasuppoq iligiit arfineq pingasut qulilluunniit VM-mut anngunniunnermi peqataajumaartut.
Kommuneqarfik Sermersooq aamma Namminersorlutik oqartussat tamarmik immikkut 1 million koruuninik aningaasalereerput.
Aningaasartuutit amerlavallaalissappata aaqqissuisuunissamit februaarip aallaqqaataa nallertinnagu aaqqissuisuunissamut qinnuteqaatip tunuartissinnaanissaa TAAKp kissaatitut ilannguppaa.
