Arnat VM-mut Nuummi anngunniussinnaanerat qanilliallappoq: Kommune aningaasaleeqataajumavoq
Kalaallit arnat assammik arsartartut nammineq arsarfimminni unamminermi VM-mut anngunneq misigissanerpaat?
Tamanna assammik arsartartut kattuffiata kissaataanut ilaavoq.
Nammineq arsarfimmi VM-mut anngunniussinnaanerat qanilliallappoq Kommuneqarfik Sermersuumi kommunalbestyrelse akuersissuteqarmat ilassutitut aningaasaliinikkut VM-mut anngunniunnerup Nuummi pisinnaanissaanut 1 million koruuninik aningaasaliissuteqarmat.
- Qujanaqisumik kommunalbestyrelsep tamarmiusup ilassutitut aningaasaliinissaq akuersissutigaa, meeqqat atuarfeqarnermullu ataatsimiititaliami siulittaasoq Juaaka Lyberth Inuit Ataqatigiinneersut KNR-mut oqarpoq.
Aningaasalli tunniunneqartinnagit piumasaqaatit naammassiniarneqartussaapput.
- Piumasaqaatigineqarpoq aningaasaliisussatut qinnuteqaateqarfigineqartut Kommuneqarfik Sermersuup aningaaliissutaasa amerlaqataannik aningaasaliissuteqassasut, Juaaka Lyberth oqarpoq.
AAMMA ATUARUK Finale: Puerto Rico kuultinnattoq - nunarpullu sølvinnalluni
Siunnersuut qaqilerneqarpoq assammik arsartartut kattuffiat TAAK saaffiginnissuteqarmat arnat VM-mut anngunniunnerannik 2023-mi aaqqissuisuunissamik qinnuteqarnissamik taperserneqaqqulluni.
Misigisaq pikkunartoq
Unammineq angutit VM-mut anngunniullutik Nuummi PanAm 2018-mi unamminerattut annertutigissanngilaq. Taamani iligiit amerika kujallermiit avannarlermiillu tikerarput taamalu missingersuutit 20 millioner koruunit sinnerlugit.
Tamatumali kingorna panamerikamiut kattuffiat kujallermut avannarlermullu avinneqarpoq Nunarput maann Amerika avannarlermiut Caribiamiullu kattuffianni NACHC-mi ilaasortaalluni.
Assammik arsartartut kattuffiata maanna ilimagaa arnat Nuummi VM-mut anngunniunnerat 6 millioner koruunit inulaarlugit akeqarumaartoq.
Juaaka Lyberth aamma neriuppoq kalaallit arnat assammik arsartartut angutitamisulli misigiumaaraat nammineq arsarfimmimmi soorlu 2018-mi taama angutit misigisaqartut.
Foto: Anders Berthelsen/GHF
- Misigisaq pikkunarlunilu pissanganartorujussuuvoq. Inuiaqatigiinnik ataatsimoortitsivoq ataatsimullu anguniagaqartitsilluni. Taamani nerioqaagut kalaallit anngukkumaartut misigisarlu nuannersorujussuuvoq, Juaaka Lyberth oqarpoq.
AAMMA ATUARUK Nunarput bronzinnanngitsoorlunilu VM-imut anngutinngitsoortoq
Taamanili angutit assammik arsartartut VM-mut anngutinngillat. Aamma arnat nunanut allanut unammisartut 2021-mi VM-mut anngunniunnermi finalemut anngupput tassanili Puerto Rico ajorsarfigaat Amerikap avannaamiut Caribiamiullu VM-mi inissatuaat taakku pissarsiaralugu.
TAAK-mit maanna sulissutigineqarpoq Naalakkersuisuniit aamma timersortartut kattuffiiniit tapersersorneqarnissaq.
