Nunarput bronzinnanngitsoorlunilu VM-imut anngutinngitsoortoq
Nunarput Chilelu assammik arsarluni amerikap nunavittaani pissartanngorniunnermi bronzinnanniunnerup silarsuarmi aappaagu pissartanngorniunnissamut anngunniunnerusup, annersaani naligiittorujussuugaluarlutik, unamminerullu naammassinerani naligiimmata unammineq sivitsorneqaraluartoq, kalaallit naggataatigut 36-39-mik ajorsarput.
Chilemiut unamminerup ingerlanerani amerlanerujussuarnik isertitsisinnaagaluarput, nunattali unammisartuisa målmandiat, Isak Olsen, annaassisaqattaarpoq.
Kalaallilli Chilemiut isertitsinngitsooqattaarnerat atorluanngitsoorpaat.
AAMMA ATUARUK Kalaallit semifinalimi ajorsartut
Naligiittorujussuit
Nunarput Chilelu muminnginnermi naligiittorujussuupput, unamminermilu pissanganarluinnartumi paarlakaajaallutillu siuartarlutik.
Nunatsinneersullu mumingajalernermi marlunnik siuarput, Chileli marloriarlutik isertitsipallammata, minutsialunnguiinnarni siuarsimallutik.
Muminnermilu tamarmik 16-inik isertitaqarlutik naligiipput.
Kalaallit muminnerup kingorna isertitsipallapput, chilemiulli naligiileqqipallallutik. Chileli minutsit arfineq-marluk ingerlareersut marlunnik siuarput.
AAMMA ATUARUK Kalaallit Pan Am-imi semifinalernissaq qulakkeeraat
Toqqaannartumik isertitseriartussanngortoq
Aammali muminnerup kingorna naligiittorujussuupput. Chilemiulli unamminerup naammassinissaanut minutsit sisamaannanngortut marlunnik siuarput.
Kalaallillu naligeeqqileraluartut unammineq naammassilluinnartoq ataatsimik kinguarsimallutik toqqaannartumik isertitsisussanngorput, Minik Dahl Høegilu isertitsimmat, unammineq sivitsorneqarpoq.
Unamminerulli sivitsorneqarnerata immikkoortua siulleq naammassimmat chilemiut pingasunik siuaqqapput.
Taakkulu kalaallit unamminerup sivitsorneqarnerata immikkoortuata aappani angunngimmassuk, chilemiut 39-36-mik ajugaallutik bronzinnapput.