Kalaallit Pan Am-imi semifinalernissaq qulakkeeraat
Kalaallit unammisartuisa aquttuata, Minik Høegh Damip Canadamiut unamminermi arsarluarneruleriartuinnarnerat siusinnerusukkut aarlerisaarutigaa taamaammallu ajugaaffiginiarnissaat ajornakusoorsinnaassanerarlugu.
Kalaallilli unammisartuisa imminnut upperilluartut Canadap Nuummi Inussivimmi assammik arsaannermi unammersuaarnermi periarfissarsinnginnissaat qulakkeerpaat.
Kalaallit unamminerup aallartinneraniilli eqqissiivillutik siariartorput, isertitsinernillu arfinilinnik siuaqqallutik unamminermi unikkallarput.
VM-imut peqataanissaq qulakkeeqqajaagaat
Kalaallit unammisartui canadamiunit unikkallarnerup kingorna siuariangaatsiarput, unamminerillu immikkoortuisa aappaani minutsit 15-it ingerlariiginnartut kalaallit isertitsinernik qulinik siuaqqalerlutik. Siuaqqaneq taanna unammisartut unamminerup naammassinissaata tungaanut illersorpaat, unamminerlu 32 – 20-mik inerneqarluni naammassivoq.
Taamaalilluni nunatsinniit unammisartut gruppiminni normu 2-tut inissisimalerlutik gruppi A-mi ajugaasut tassa Argentina arifninngorpat unammisussanngorpaat.
Unammisartut semifinalertussanngornerminni Amerikap nunavittaani unammersuaarnermi inissisimalluarput. Nunanut allanut unammisartut normu 3-p akornanni inissisimagunik anguniakkaminnut – tassa nunarsuarmi pissartanngorniuunnermut Danmarkimi Tysklandimilu januaarimi 2019-imi ingerlanneqartussamut angutissapput.
2019 World Men's Handball Championship
AAMMA ATUARUK Canadamut unammilerunik ajugaassangavoq