Canadamut unammilerunik ajugaassangavoq
Amerikap nunavittaani assammik arsartartut pissartanngorniuneranni PAN AM 2018-mi kalaallit nunanut allanut unammisartui pingasunngornermi Brasiiliamiunut unammigamik ajorsangaatsiarput, Brasiiliamiut 36-nik isertitaqarlutik ajugaapput Kalaallit 26-nik isertitaqarlutik ajorsartut.
Kalaallit puljaminni unammisassaat kingulleq aamma ingerlariaqqinnissaannut aalajangiisuuusssaq unnugu pissaaq, Canadamut unnugu unammilerunik.
Canadamut unammineq sioqqullugu Kalaallit Nunaat puljamini normut 2-tut inissisimavoq, Uruguay Braziilialu ualimut unammigamik Uruguay ajorsarput, taamaalillunilu Kalaallit Nunaat semifinalimut ingerlariaqqinnissaminut qulakkeerinnissinnaavoq Canadamut unamminermi ajugaaguni imaluunniit naligiikkunik.
Kalaallit assammik arsarlutik nunanut allanut unammisartuisa aquttuata Minik Dahl Høeghip unnugu Canadamut unammilerunik ajugaanissartik naatsorsuutigaa.
- Semifinalernissamut qulakkiissaagutsigu ajugaasariaqaavippugut, unnugumut allanik anguniagaqanngilagut ajugaanissaq kisiat anguniarparput, Minik taama oqarpoq, - qularinngilara aamma ajugaanissarput periarfissagissaartorujussuugatta, Canadamut unammisarnitsinni eqqaamanngilara ajorsarnikuunitsinnik, Minik Dahl Høegh oqarpoq.
Kalaallit Nunaata Canadallu unamminerat unnugu arfineq pingasunut aallartitussaq KNR TV-imi isginnaarneqarsinnaavoq.
AAMMA ATUARUK Kalaallit brasiliamiut qarmagaat naapippaat
