Kalaallit brasiliamiut qarmagaat naapippaat
Naak kalaallit Nuummi Inussivimmi pissaaneqarnerusunut Brasiliameersunut pingasunngornermi unnukkut unammimmata isiginnaartut amerlangaartut nunaqqamminnut illersuipput.
Kalaallit brasiliamiullu unamminermi minutsit siulliit 15-it naligiinngajalluinnaraluarput, kalaallilli periutsiminnik kukkullattaarnerisa kingorna amerikap kujataaneersut siuariangaatsiarput.
Unamminermi minutsit 20-ngajaat ingerlareersut nunanut allanut unammisartunut sungiusaasoq, Ingi Olsen timeoutimik piumasaqarpoq, nunanulli allanut unammisartunut sungiusaasup sukannerusumik oqaluussinera kissaatigisatut kinguneqanngilaq.
Unikkallareernermi iluatsinngitsumik akiuukkaluartut
Brasiliamiut unikkallarnermi isertitsinernik qulinik siuarsimaput.
Kalaallit unikkallareernermi nikingassutsimik aaqqeeriaraluarput, brasiliamiulli ajugaanissaanik nalornisitsiniarnissaq iluatsinngilaat.
Unammineq 26 – 36-imik inerneqarluni, brasiliamiut ajugaapput.
Kalaallit Nunaat tulliani Canadamut unammissaaq. Unammineq aqagu inuiattut ullorsiornitsinni pissaaq, tamannalu KNR TV-kkut nalunaaqutaq unnukkut arfineq-pingasunut aallartissaaq.
AAMMA ATUARUK Ajugaaneq misigissuseqartitseqisoq