Jens-Frederik Nielsen EU-p tungaanukartoq: - Europamiut suleqatigiinnerannut pingaaruteqarpugut

Naalakkersuisut siulittaasuat Jens-Frederik Nielsen (D) Europap inatsisartuisa oqalugiartarfiannut Strasbourgimiittumi pingasunngornermi nikuikkuni, oqariartuutaa immikkut ittuussaaq: Kalaallit Nunaat nunatut aningaasaliiffissatsialaavoq.

Jens-Frederik Nielsen Europami politikerinut oqalugiartussatut qaaqqusaanikuuvoq.

- Siunissami qanoq iliorniarnerluta erseqqissumik oqaatigissavarput. Suleqatigut oqaluttuutissavagut nunatut aningaasaliiffigiuminartuusugut. Tamanna nunatta ineriartorneranut pingaaruteqarpoq, aamma Europamiut suleqatigiinneranni pingaaruteqarpugut. Europamiut Nunattalu akornanni suleqatigiinneq nukittorsarneqarpat, aamma EU-p Kalaallit Nunaatalu akornanni, tamanna tamatsinnut iluaqutaassaaq, taanna oqarpoq.

EU piffissami kingullermi politikkikkut oqallisaavoq. EU-mut ilaasortaanerup iluaqutissartai ajoqutissartaalu pillugit nassuiaaqqittoqartariaqarnersoq Inatsisartuni oqallisigineqarpoq.

Tamatuma saniatigut Kalaallit Nunaat Savalimmiullu Københavnimi sapaatip-akunnerani kingullermi EU-p ataatsimeersuarnerani, politikkikkut ataatsimiinnermut pisortatigoortumik ingerlanneqartumut, European Political Communitymut siullermeersumik qaaqquneqarput. Tassani Jens-Frederik Nielsen Frankrigip præsidentiata, Emmanuel Macronip, saniani issiavoq.

Tusagassiortorpassuit Københavnimi Bella Centerimi EU-p sapaatip akunnera kingullermi ataatsimeersuarnerata nalaani. Assi © : Kristian Tuxen Ladegaard Berg/SIPA/Ritzau Scanpix

EU-kommissionip siulittaasuata Ursula von der Leyenip periarfissaq atorluarlugu erseqqissaqqippaa ataatsimiititaliarsuup nunatsinnut aningaasatigut tapiissutit marloriaatinngortikkusukkai. 2028-miit 2034-mut 530 millionit euronik – tassa 4 milliardit koruunit missaanniittunik – immikkoortitsinissaq siunnersuutigineqarpoq.

- Naalakkersuisut taakku itigartinngilaat, Jens-Frederik Nielsen oqarpoq.

- Aningaasanik amerlanerusunik immikkoortitsisoqarnissaa nuannaarutigaarput. Qanorpiaq agguataarneqarsimanersut suli naammattumik ilisimanngilarput. Aningaasalli nunamut aningaasaliissutigineqartut nunap ineriartorneranut tapersiissapput Kalaallit Nunaannilu innuttaasunut iluaqutaajumaarlutik, tamannalu aningaasaliissutini tamani ujartortarparput.

Suleqatigiinneq patajaannerusoq

Naalakkersuisut danskillu naalakkersuisui qaammat kingulleq oqaluttuarisaanermi siullerpaamik isumaqatigiissuteqarput, tassani Danmark nunatsinnut 2026-miit 2029-mut aningaasaliissutissanik 1,6 milliardit koruuninik immikkoortitsivoq.

Danmarkip EU-llu aningaasatigut tapersersuineri siunissami namminiilivinnissamik takorluukkanut qanoq attuumassuteqarpat?

- Tunngavissatsinnik nukittunerusumik pilersitsiniarpugut aningaasaqarniarnerullu tungaatigut nukittunerusumik inissisimalerniarluta. Aningaasaqarneq assigiinngitsorpassuarnik tunuliaqutalik, Kalaallit Nunaat imminut napatissinnaasoq, inuiaqatigiittut namminersortuunissaq anguniaratsigu. Taamaattumik naalakkersuisut takorluugaat tassuuna taperserneqarput. Suliami tassani naalakkersuisunut pingaarnerpaavoq nunaqavissunut innuttaasunullu iluaqutaanissaannik qulakkeerinninnissaq, tassungalu periarfissarpassuusut takusinnaavarput, taanna oqarpoq.

Kalaallit aallartitaat novembarimi EU-mut qaaqquneqartut KNR-ip siornatigut paasisimavaa.
Tassani EU-miit tapiissutit suliniutinut sorlernut atorneqassanersut nunatta EU-llu sukumiinerusumik eqqartussavaat.

Naak Jens-Frederik Nielsenip EU-mik suleqateqarnerunissaq pingaartikkaluarlugu, Københavnimi tusagassiortunik sapaatip akunnerani kingullermi katersortitsinermini Kalaallit Nunaat EU-mut ilaasortaarusunngitsoq erseqqissarpaa.

Europami politikerit nuimasut kingullertigut arlaleriarlutit ataatsimeeqatigisimavatit. Ataatsimiinnerni sunarpiaq anguneqartarpa?

- Nunanik, arlalitsigut naleqartitatta tungaatigut assigiiffeqarfigisatsinnik, oqaloqateqartarnitta ataatsimeeqateqartarnittalu pitsaanermik patajaannerusumillu suleqatigiinnerulernissamut tunngaviliisuunissaat pingaaruteqarpoq.

- Oqaloqatigiinnerit suli amerlanerusut pissapput, nunalli akornanni suleqatigiinnerup EU-millu suleqateqarnerup nukittorsarneqarnera, kalaallit, piffissaq ungasinnerusoq eqqarsaatigalugu, iluaqutigisinnaavaat tamannalu misissorniarparput, Jens-Frederik Nielsen oqarpoq.