Jens B. attortissimaqaluni tunuarnini nalunaarutigaa

- Uannut pingaartorujussuuvoq, nuliama sisamanngormat ualikkut oqarfigimmga, qaa Jensi - taamaa! Taama nuliama oqarnera ataqqisorujuuvara.

Demokraatit sinnerlugit Inatsisartuni ukiuni quligiluani kingullerni ilaasortaq, Demokraatit siulittaasuat, Jens B. Frederiksen attortisimaqaisoq taama aallarniivoq.

Aatsitassarsioqatigiiffimmi, True North Gems-imi, Jens B. Frederiksenip atorfininnini, partiip siulittaasuattut Inatsisartunilu ilaasortaajunnaarnerminut tunngavilersuutigaa. Aamma ilaatigut tunngavilersuutigalugu, sapaatip akunnerata ataatsip matuma siornali, atorfinitsinneqarnerminut atatillugu kikkunnit tamanit isornartorsiorneqarnini. Ilaatigut Inatsisartuni Demokraatit ilaasortaatitarisimasaannit, Palle Christiansenimit aamma Demokraatit inuusuttaannit.

- Palle Christiansenip, maanna Danmarkimut nuussimasup isornartorsiutai oqaaseqarfiginianngilakka. Demokraatilli inuusuttaasa isornartorsiutaat, Demokraatit siulersuisuunerisa nalaani ippassaq eqqartorneqarput. Soorunami inuusuttut uparuaataat ataqqivagut, taakkulu oqarfigineqarput, uparuagassaqaraagat uparuaasaqqullugit kisianni inunnut ataaasiakkaanut tuungasut uparuaasarnissat sianingineqartassasut aamma oqarfigalugitigit, Jens B. Frederiksen oqarpoq.

True North Gems-imi qaffasissumik atorneqarnerminut atatillugu, politikkikkut oqaaseqarsinnaasannginnissani, Jens B. Frerderiksenip tunuarnerminut ilaatigut patsisaasoq oqaatigaa.

- True North Gems-imi atorfinitsinneqarnera pissutigalugu sakkortoorujussuarnik uparuarneqartarpunga, taamaattumik Inatsisaartuni ilaasortaatillunga tutsuiginartumik oqaluttarnissara soorunami upperineqarnavianngilaq. Tassa Inatsisartuni ilaaasortaaginnassanguma, pasineqaannavittussaassaanga aatsitassarsiortunut tunngasunik oqallinnerni parteera tunngavigalugu oqaluttutut, Jens B. Frederiksen oqarpoq.

Demokraatit immikkut ittumik martsip aqqaneq aappaanni ataatsimeersuarneranni, Jens B. Frederiksen pisortatigoortumik siulittaasutut aamma Inatsisartuni ilaasortatut tunuassaaq.

Demokraatit siulittaasuata tullia, Anda Uldum aperaarput, Jens B. Frederiksenip tunuarnera qanoq Demokraatinut sunniuteqassanersoq, Anda Uldumilu ima akivoq.

- Jens B. Frederiksenip siulittaasuujunnaarnera aamma Inatsisartuni ilaasortaajunnaanera annaasaqaataavoq annertoorujussuaq. Jens B. Frederiksen politikerisut pikkoriffeqarpoq aamma inuttut pikkoriffeqarluni. Demokaartit siulittaasuata tullia, Anda Uldum taama oqarpoq.

Jens B. Frederiksenip Inatsisartuni ilaasortaajunnaarnerani, Michael Rosing Inatsisartuni ilaasortaalissaaq.