Inga Dóra Markussen politikkimik suliaqarunnaartoq: Sulinini ilaquttanilu qitiutinniarai
Ukiuni pingasuni nunatsinni politikkimi pikkunartumi, Nuummi Siumumi gruppimut siulittaasuutitsisimasumi Siumumilu siulittaasup tullersortaatitsisimasumi kiisalu 2021-mi kommunimut qinersinermi 358-nik qinersiseqartitsisimasumi, sulereerluni Inga Dóra G. Markussen politikkimik ”suliaqarunnaarallarpoq”, taanna tusagassiorfinnut nalunaarummi nammineq ilisimatitsivoq.
Taanna Air Greenlandimi Piujuartitsinermut attaveqatigiinnermullu pisortatut atorfittaarpoq, ilaquttanilu piffissaqarfiginerulerniarpai, politikeriujunnaartoq taama nalunaaruteqarpoq.
Politikerit ataqqingaarpai
Inga Dóra G. Markussenip nammineq kissaatini malillugu kommunalbestyrelse tulliani ataatsimeereerpat politikkimiit aniniarpoq.
- Qineqqusaarutikka saqqummiuppakka, Siumut gruppia tunuliaqutaasullu peqatigalugit. Sorpassuit oqaluuserineqartippavut, tusagassiorfinnut nalunaarummi taama allassivoq.
Taassuma politikeritut sulineq sakkortusinnaanerarpaa, taamaammallu politikerinut ataqqinnissuseqangaarnini oqaatigaa.
- Naalakkersuinernik suliaqalersartut tamaasa ataqqisupilussuusarpakka, naalakkersuinikkut suliaqarmata, qinigaappata qinigaanngippataluunniit, nalunnginnakku tamanna sunik piumasaqaatitaqartoq.
Inga Dóra G. Markussen Air Greenlandimi atorfittaamini qaqugu aallartissanerluni ilisimatitsissutiginngilaa.
