Siumut Nuuk nutaamik siulittaasortaartoq

Siumup Nuummi immikkoortortaqarfiata sapaatiummat ataatsimeersuarnerani tamanna aalajangerneqarpoq.

Taamaalilluni Doris J. Jensen siulittaasutut qinigassanngorteqqinngitsoq siulittaasutut taarsissavaa.

Inga Dora G. Markussen Nuup Kommunerisimasaata kommunalbestyrelsiani 1997-imit 2001-imut ilaasortaallunilu borgmesterimut tullersortaavoq.

Ineriartornerup qanoq sammiveqarnissaanut akisussaaqataanissamik kissaateqarnini politikkimik suliaqaqqilernerminut pissutaasoq, Siumut Nuummi siulittaasunngortoq 48-nik ukiulik, Inga Dora G. Markussen, tusagassiorfinnut nalunaarpoq.

- Paasivara mobilera saannut ilillugu nakkutiginiarukku nikisitsisoqarnavianngitsoq. Naammannavianngilaq. Paasivara inuiaqatigiittut attukkavut pitsaanerulissappata iliuuseqartoqassasoq, Inga Dora G. Markussen oqarpoq.

Aki-Mathilde Høegh-Dam siulittaasup tulliatut qinigaasoq

Inga Dora G. Markussen imigassaq ikioroornartullu pillugit siunnersuisoqatigiinni siulittaasuuvoq INI A/S-illu siulersuisuini ilaasortaalluni, ilaatigullu aviisimi AG-mi aaqqissuisuusimalluni Nunat Avannarliit Killiit Siunnersuisoqatigiivinullu qullersaajusimalluni.

Siumut Nuup siulittaasuata tullianut aamma qinersisoqarpoq. Folketingimut ilaasortaq, Aki-Matilthe Høegh-Dam atuuffimmut tassunga qinigaavoq.