Piitsuussutsimut killiliissummik aalajangiisoqarnissaa akuersissutigineqartoq

Inatsisartut piitsuussutsimut killiliissummik aalajangersaasoqarnissaa akuersissutigaat. Nunatsinni inuit kikkut qaqugulu piitsutut taaneqarsinnaanerannut tamanna killiliissaaq. KNR-ip imminut piitsuunerartartoq naapippaa.
Allattoq Aviâja Kilime
novembarip 29-at 2018 13:05

Qaqugukkut piitsuulertarneq uuttorneqarsinnaassaaq. Politikerit tamatumunnga politikkiliornissamut pisariaqartitsisunut ikiorsiissutissamik pitsaanerusunik atortussaqalersitsipput

Taamaammat Inuit Ataqatigiit piitsuussutsimut killiliissuteqarnissamut siunnersuutaat Inatsisartut isumaqatigiiffigaat.

Tassa piitsuunerup qanoq annertutigineranut takussutissiisinnaasunik immikkut ittunik anguniagassanik takussutissiisunillu 2019-imi suliaqartoqassaaq.

Imminnut ullumikkut piitsutut oqaatigisartup ilaat tassaavoq Elvira Gyllich. Elvira Gyllich uinilu 2015-imi Nuummi suliffissaqarmat angerlarsimaffissaqaratik Tasiilamiit Nuummut nuupput. Nuummi blokkit ilaasa torsuusaanni ukioq ilivitsoq unnuisariaqartarput. ​

AAMMA ATUARUK Partier støtter en fattigdomsgrænse

Elvira ilinniarsimanngitsutut sulisarpoq. Angerlarsimaffeqaranilu suliniarneq ilungersunarsimaqaaq.

Aappariit misiliisaqattaareerlutik angerlarsimaffeqanngitsut ornittagaanni, Kialaarfimmi unnuisinnaatitaalerput.

- Qiasariaqarlunga taamani nuannaangaarama. 'Kaar qiiananngitsumi sinissuunga.'

Elvira Gyllich 49-inik ukioqarpoq. Toqqusaamigut kræfteqarluni siorna februaarimi paasivaa. Tamannali tunniutiinnarfiginngilaa. Maanna kemoterapi ingerlappaa.  Elvira Gyllich maanna suliffeqanngilaq taamatullu ikiorsiissutinik pisartagaqarani oqarpoq.

AAMMA ATUARUK Kofoeds Skole og Mio ser positivt på fattigdomsgrænse

Kofoedskolep inuiaqatigiinni inuuniarnermikkut ajornartorsiuteqartorpassuit attaveqarfigisarpai taamaakkaluartorli forstanderip kikkut piitsuunerat piitsuunermik pisortatigoortumik uuttuuteqannginnera pissutigalugu oqaasertaleruminaatsippaa. 

​- Sunaanera paasiuminaappoq. Soorlulu oqaluttualiaq nangeqqiinartoq. Kikkut tamarmik piitsuussusermik oqalupput, kisiannili suunera nalullugu. Oqaaseq 'piitsoq' qanoq paasivarput?, Gujo Thorsteinsson oqarpoq.

AAMMA ATUARUK Piitsuussutsimut killiliussamik pilersitsinikkut ajornartorsiutit sammineqarnerulersinnaasut

Elvira Gyllichilli pitsuuneq nassuiaatiginiarsaraa.

-Naluara qanoq isumaqartoq 'piitsuuneq'. Uanga takorloorsinnaavara soorlu ineqanngitsoq piitsuusoq. Uanga taamannak naatsorsuutigisinnaavara.

Imminullu tunngatillugu tamanna qularutiginngilaa.

- Angerlarsimaffeqannginneq pissutigalugu piitsutut pisinnaavunga.

Aamma atuaruk