Piitsuussutsimut killiliussaq iluaqutaassangatinneqarpoq
Nunatsinni inuuniarnermikkut aningaasaqarnikkullu ajornartorsiuteqartut iliuuseqarfigineqarnissaat Kofoeds Skolemit ujartorneqarpoq.
Politikerinilli iliuuseqartoqartinnagu ajornartorsiutip qanoq annertutiginera paasineqaqqaartariaqarpoq, tassungalu piitsuussutsimut killiliussaq ikiuutaassasorineqarpoq.
- Piitsuussuseq kisitsisinngorlugu killeqartilerneranut qaqugukkut piitsuusoqartarnersoq inissinneqarnissaa pingaaruteqartorujussuuvoq, Kofoeds Skolemi forstanderi Gujo Thorsteinsson oqarpoq.
AAMMA ATUARUK Piitsuussutsimut killiliussamik pilersitsinikkut ajornartorsiutit sammineqarnerulersinnaasut
Nuummi inuit inuuniarnermikkut ajornartorsiutillit taassuma sullitarai, piitsuussutsimullu killiliussamik atuutsitsisoqaleraluarpat iluaqutaassasoralugu. Ajornartorsiutimmi sammineqarnerulerneranut politikkikkut iliuuseqartoqarsinnaalersinnaammat.
Ajornartorsiutip politikerinit ukkatarineqarnerulersinnaanera Meeqqat illersuisuata aamma nuannaarutigaa.
- Ukua naligiinnginnerit eqqarsaatigalugit isumaqarpunga sakkussatsialaasoq aallartinnerusorlu pitsaasoq, Meeqqat illersuisuat Aviaaja Egede Lynge oqarpoq.
- Soorunami neriuutigivarput innuttaasut meeqqanullumi naligiinnerusumik atugaqalernissaannut atorneqarsinnaalissasoq iliuusissatut.
Ikiorneqarnissamut pisariaqartitsisut iluamik ikiorneqartalernissaannut piitsuussutsimut killiliussaq iluaqutaassasoq Thorsteinssonip neriuutigaa.
AAMMA ATUARUK Piitsuussutsip killinganik aalajangiisoqarnissaq Aaja Chemnitz Larsenip siunnersuutigaa
- Sakkussatsialaavoq, politikkerinuinnaanngitsoq uagutsinnullumi aamma, forstanderi oqarpoq, naqissuserlugu sakkussaq inuuniarnermikkut ajornartorsiutilinnik suliaqartuusut tamarmik atorsinnaassagaat.
Piitsuussutsimut killiliussaq ukiorpassuarni politikkikkut eqqartorneqartareerpoq. Piitsuussutsimulli killiliisoqassappat politikkikkut suliaqartut killigititassaq isumaqatigiissutigisariaqaraat isumaginninnermut naalakkersuisoqarfiup nalunaarusiaani kingullermi kaammattuutigineqarpoq.
Naalakkersuisoqatigiimmi allanngortillugit piitsuussutsimut killiliussap allanngortinneqartarnissaa iluaqutaajunnanngimmat.
AAMMA ATUARUK IA Qoornumi ataatsimiippoq
AAMMA ATUARUK Qanoq pissakitsigut piitsutut isigineqassappat