IA Qoornumi ataatsimiippoq

Inuit ataqatigiit Qoornumi eqqartugaasa ilagaat pisiassat akitsoraluttuinnarnerat uuliallu akiata qaffakkiartuinnarnera piitsuussutsimut pilersitsisoq, Kuupik Kleist Qoornumiittoq oqaloqatigaarput.

- Nunarsuaq tamakkerlugu niuerfiup ilaaniitilluta akit qaffakkaluttuinnarnerat isertorneqarsinnaanngilaq, Kuupik Kleist oqarpoq.

Taanna nangilluni erseqqissaavoq inuit namminneerlutik akit pillugit iliuuseqarsinnaanerat killeqartorujussuusoq, akit nunarsuarmi aalajangersorneqartarmata.

- Nunatsinni piitsuussutsimut tunngatillugu naalakkersuinikkut iliuuserisinnaasarput tassaavoq piitsuussutsip pisortatigoortumik killeqartariaqarnerata qanoq aalajangersaaffigisinnaanera. Eqqartuinnarnagu, taamaalilluta sakkussaqalissaagut qaqugukkut inuit pisortaninngaanniit ikiorserneqartariaqarnerat sukkut killeqassanersoq, aammalu qaqugukkut inuit ataasiakkaat imaluunniit ilaqutariit piitsuusutut oqaatigineqartariaqarnersut sakkussaqartilissagutsigit, Kuupik Kleist oqarpoq.

Taanna aperaarput, piitsuussuseq qaangerneqassappat akileraartarneq allanngortittariaqarsorineraa.

- Inuit ataqatigiinnut pingaaruteqartorujussuuvoq pisuussutit atugassarititaasullu naligiinnerusumik agguarneqarnissaat anguniarneqassasoq, akileraarnikkullu sakkussat uagut piukkunnarnerpaatut isigaavut, oqarpoq.

Tamannalu pisariaqavissuunerarpaa.

- Annikitsuinnarmik alloriartoqartarpoq massakkullu alloriaqqinnissaq pisariaqavippoq, Kuupik Kleist Qoornumiit taama oqarpoq.

Inuit ataqatigiinni ilaasortat 40-t missaaniittut maannakkorpiaq Qoornumi ataatsimeeqataapput.