Politikki

Piitsuussutsip killinganik aalajangiisoqarnissaq Aaja Chemnitz Larsenip siunnersuutigaa

Kalaallit Nunaanni piitsuussutsip killinganik aalajangersaasoqarnikuunngilaq. Tamannali siunissami piviusunngorsinnaavoq. Aaja Chemnitz Larsen, IA, inatsisartut upernaanakkut ataatsimiinnissaannut Naalakkersuisut peqquneqarnissaannik Inatsisartut aalajangiiffigisassaanik siunnersuteqarpoq, piitsuussutsip killinganik aalajangiisoqassasoq.

Allattoq Jaaku Lyberth, Ivik Kristiansen

februaarip 09-at 2015 14:23

Piitsuussutsip killinganik aalajangiisoqarnikkut aningaasatigut naligiinnginneq akiorniarneqarsinnaasoq, Aaja Chemnitz Larsen, IA, isumaqarpoq.

Kalalallit Nunaanni Naatsorsueqqissaartarfiup kisitsisaataani atuarneqarsinnaavoq ilaqutariit meerartallit akornanni naligiinnginneq 2013-miit alliartortoq, tamannalu ernumanarluinnartuusoq, siunnersuuteqartoq isumaqarpoq.

Aamma atuaruk Meeqqanik sumiginnaasarneq pillugu oqallinneq takoqqiguk

Piitsuussutsip taamatullu aningaasatigut naligiinnginnerup akiorniarneqarnissaannut siunnersuutinik arlalinnik Aaja Chemnitz Larsen saqqummiussaqarpoq, ilaqutariit meerartallit eqqarsaatigineqarnerullutik.

Siunnersuuteqartup inassutigaa, faginut arlalinnut tunngasunik suleqatigiissitanik pilersitsisoqassasoq piitsuussutsimut isiginniffimmik tamanik qimerluuisusamik.

Inatsisartut upernaakkut ataatsimiinnissanni oqaluuserisassat qulequtaat uani takukkit

Piitsuussutsip killinganik aalajangersaanerup siunertarissavaa ilaqutariit meerartallit immikkut iliuussissanik pilersaarusiornermut tunngaviliissasoq, siunnersuuteqartoq isumaqarpoq.

- Piitsuussutsip killinganik aalajangersaaneq isumaqassaaq ilaqutariit immikkut iliuuseqarfigineqarnissamik pisariaqartitsisut iliuuseqarfiginissaat siunnerfileruminarnerulissasoq aammalu innuttaasut pissakitsut naalakkersuinikkut malunnarnerungaartumik ukkatarineqalissasut, Aaja Chemniz Larsen siunnersuuteqarnermini taama tunngavilersuivoq.

Aaja Chemnitz Larsenip siunnersuutaa Inatsisartut upernaakkut ataatsimiinnissaani marsip pingajuani aallartitussami oqaluusersineqartussat katillutik 103-usut ilagaat.