Qanoq pissakitsigut piitsutut isigineqassappat
Taamaalioqqusinermi siunertaavoq pissakitsut nakkutigineqarnissaat, pissakitsullu amerliartornersut ikiliartornersulluunniit misissorneqarnissaannut assersuutissaqartoqartariaqarmat.
Meeqqat Inuusuttullu Pillugit Ilisimasaqarfimmiit nalunaarusiap takutippa meerarpassuit pissakilliortut. Nalunaarusiami pingaarnertut atuakkiortup, Steen Wulffip Nunatsinni meeqqat inuusuttullu pillugit paasisanik pingaarnersiuinini aallaavigalugit nunatsinni akisussaasunut arlalinnik siunnersuuteqarpoq, meeqqanut atugassaritinneqartut Nunat Tamat Peqatigiiffiata Meeqqanut komiteata maleruaqqusaat naapertorlugit meeqqat atugaqaleqqullugit. Siunnersuutinullu ilaavoq nunatsini pisortatigoortumik pissakitsutut taaneqartut nalilernissaannut killiliisoqarnissaa.
- Kalaallit Nunaanni pissakitsutut taaneqarnissamut killiliisoqarnikuunngimmat misissuinitsinni nunani allani ilisimatuutut misissuisartut naliliinissamut killigitittagaat atorpavut, taakkuli killigititat Kalaallit Nunaanni pisortatigoortumik akuerineqarnikuunngillat. Kalaallilli Nunaanni pisortatigoortumik killigititanik pisariaqartitsivugut, misissuinerni assersuutissaqartariaqaratta. Nunallu Tamat Peqatigiiffianni Meeqqanut Komitep nakkutigeqquaat nunani assigiinngitsuni meeqqat atugaasa misissorneqarlutillu nalilersorneqarnissaat, Steen Wulff oqarpoq.
