Piitsuussutsimut killiliussamik pilersitsinikkut ajornartorsiutit sammineqarnerulersinnaasut
Piitsuussutsimulli killiliinissaq politikkikkut tamatigoortumik isumaqatigiissutigineqartariaqarpoq.
Naligiinnginneq piitsuussuserlu kiisalu piitsuussutsimut killiliussassamik nunatsinni aalajangiussinissamut periarfissat pillugit nassuiaammi, Naalakkersuisut suliaritissimasaanni, inerniliussat ilaat taama oqaasertaqarpoq.
- Piitsuussutsimut killiliussap sunniuteqarfigilluagaa tassaasinnaammat inuiaqatigiinni piitsuussutsimik ajornartorsiutit ukkatarineqarnerulernerat, tassuunakkullu politikkikkut iliuuseqarnissamut kaammattuutaalluni, nassuiaammi taama allassimavoq.
Piitsuussutsimulli killiliussamik eqqussinissamut mianerisassat arlaqarput, ilaatigut eqqunneqarnissaa politikkikkut tamatigoortumik isumaqatigiissutaasariaqarpoq.
Aamma piitsuussutsimut killiliussaq arlaatigut atussagaanni misissueqqissaarnerit allat ingerlanneqarnissaat pisariaqarluinnarpoq.
- Taamaalilluni pingaarutilittut inassuteqaat tassaavoq, piitsuussutsimut killiliussaq naligiinngissutsip piitsuunerullu misissorneranni periaatsitut kisimiitinneqassanngitsoq. Nalilersuilluni misissueqqissaarnernik tapertaqartinneqartariaqarpoq - piitsuussutsip peqqutaanik kingunerisaanillu misissuiffiusunik, nassuiaammi taama allassimavoq.
Inatsisartut 2015-imi aalajangerput Naalakkersuisut nalunaarusioqqullugit peqquneqassasut nassuiaallu kingusinnerpaamik 2017-imi ukiaanerani tunniunneqassasoq.