Assi: MIO

Meeqqat illersuisuat: Imigassaq pillugit inatsit tuaviuussaavallaarpoq

Imigassamut inatsisip ukioq ataasiunngitsorluunniit atuutereersup allanngorteqqinniarneqarnera, Meeqqat illersuisuata Aviaja Egede Lyngep, tuaviuussaavallaarsoraa.

Inatsisip qanoq kinguneqarumaarnera ukiuni arlaqartuni paasiniarneqaqqaartariaqartoq, Imigassaq Ikiaroornartullu pillugit Siunnersuisoqatigiit isumaqarput.

Naalakkersuisooqatigiillu ikorfartortaat qasukkaataasussanik allanngutissatut arlalinnik siunnersuuteqarput, taakkualu Naalakkersuisunit partiinillu arlalinnit taperserneqarput.

AAMMA ATUARUK Imigassaq pillugu inatsimmut allannguutissatut siunnersuut siullermeerneqassasoq

Meeqqalli illersuisua Inuussutissarsiornermut Aatsitassanullu ataatsimiititaliamut, inatsisip allanngortinnissaanik suliaqartumut allappoq, allannguinissaq siusippallaartoq.

- Inatsimmut tunngaviutinneqarsimavoq peqqinnissaq pillugu suleqatigiiffiiup WHO-p innersuussutaasa malinneqarnissaannik kissaateqarneq, ingammik imigassap saqqummineranut atatillugu piumasaqaatinik sukanganerulersitsinermik kissaateqarneq, tamanut tikinneqariaannaalluni ammasuunera kiisalu imigassamik sassaalliisarfiit pillugit aaqqiissutit kiisalu nakkutilliinerit eqqaarsaatigalugit, Meeqqat illersuisuat ataatsimiititaliamut taama allappoq.

AAMMA ATUARUK Amerlanerussuteqartut allanngortikkusukkaat

Taamaammat imigassaq pillugu inatsit allanngortinneqassappat, tamatuma qanoq kinguneqarsinnaanera uppernarsaatitalimmik qulakkeerneqartariaqartoq, Meeqqat illersuisuat isumaqarpoq.

Taamatuttaaq Imigassaq Ikiaroornartullu pillugit Siunnersuisoqatigiit inatsimmut allannguiniarneq isornartorsiorpaat:

- Eqqaamassavarput nunatsinni meeqqat inuusuttuaqqallu ajornartorsiortut suli amerlasoorujussuummata, tamatumani pitsaaliuineq pingaarutilik tassaalluni imigassanik aalakoornartortalinnik tuniniaavinni assiaqusersuisoqarnissaa imaluunniit kililersuisoqarnissaa, siulittaasoq Inga Dora Markussen allappoq. 

Demokraatit siunnnersuutaat akuerineqassasoq, Inuussutissarsiornermut Aatsitassanullu ataatsimiititaliap inassutigaa. Pisiniarfinni imigassanik aalakoornartortalinnik assersuinerup atorunnaarsinneqarnissaa Inuit Ataqatigiit akerleraat.

Inatsisartut allannguutissamik siunnersuut ullumi naggaammeerlugu oqaluuserissavaat.

AAMMA ATUARUK Alkohollov har ikke fået folk til at købe mindre

AAMMA ATUARUK Imigassaq pillugu inatsisip allanngortinniarneqarnera uggornarpoq

AAMMA ATUARUK Naalakkersuisut vil lempe alkohollov

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat