Agathe Fontain: Imigassaq pillugu inatsisip allanngortinniarneqarnera uggornarpoq
Inuit Ataqatigiit naalakkersuisoqatigiinniinneranni Fontain peqqissutsimut naalakkersuisuuvoq, imigassarlu pillugu maanna inatsit Inatsisartut siorna ukiakkut ataatsimiinneranni atuutilersitseqataaffigalugu.
Inatsisillu suli sunniuteqarluannginnerani allanngortinniarneqartoq tamannalu uggornartoq Agathe Fontain isumaqarpoq.
Demokraatit imigassaq pillugu inatsisip allanngortinnissaanut aalajangiiffigisassatut sisamanik siunnersuuteqartuupput, siunnersuutillu Naalakkersuisunit taperserneqarlutik.
AAMMA ATUARUK Aalakoornartutalimmik imigassartortarnerit tamarmik ajoqutaapput
Imigassanik aalakoornartortalinnik nioqquteqarsinnaanerup sivitsorneqarnissaa, imigassat assiaqusersornissaannut peqqussutip atorunnaarsinneqarnissaa imigassanillu ussassaarisinnaanermut inerteqqutip oqilisaaffigineqarnissaa ilaatigut siunnersuutigineqarput.
Demokraatilli imigassaq pillugu inatsimmik allannguiniarnerat Agathe Fontainip eqqumiigivaa.
Taanna naapertorlugu Demokraatit naalakkersuisoqataaffigisaanni assingusumik anguniagaqartoqarpoq.
- Inatsisissaq siullerpaamik siunnersuusiarineqarmat, uku uagut naalakkersuisuunitta siuliani Naalakkersuisut Siumukkut, Demokraatit Atassutikkullu taamanikkut Inatsisartuni saqqummiussaat, pinaveersaartitsinermik tunngavilersuuteqartoq, WHO-p innersuussutigisaanik tunngavilersuuteqartoq, taanna tunngavilersuutitut pitsaasutut isiginikuuarput, aamma uanga Inuit Ataqatigiinni taamani oqaaseqartuullunga. Taavalu uagut naalakkersuisunngornitsinni tunngavilersuutit taakku aamma atorpagut, Agathe Fontain oqarpoq.
