Inatsit: Imigassaq pillugu inatsit atulersinneqarmat tunisat amerlipput
Tunisalli nalunaarsorneqarnerat qiviassagaanni imigassat tunineqartut amerleriaateqartut Kalaallit Nunaanni Brusenimit oqaatigineqarpoq.
- baajanik imigassanillu akulinnik, ilaatigut mokainik sommersbynillu tunisagut marsip aallaqqaataanit septembarip 30.-ata tungaanut procentinik arfineq-pingasunik qaffariaateqarput, Jes Nyborg taama oqarpoq.
Nunatsinni imigassamik atornerluisarnerup ajornartorsiutaanera annikillisinniarlugu naalakkersuisut imigassaq pillugu inatsit allanngortippaat. Inuilli imigassanik aalakoornartortalinnik perusukkunik inatsimmit nutaamit unitsinneqarnavianngitsut, tuniniaanermut pisortaq oqarpoq.
- Kisianni qularutiginngilara inuppassuit isumatuumik imigassartorsinnaasut, pisiniarfinni takusinnaagunikkit takusinnaanngikkunikkiluunniit,suli kajumissuseqassasut, Jes Nyborg oqarpoq.
Siunnersuutit sisamat
Imigassaq pillugu inatsimmi Demokraatit allannguutissatut siunnersuutaat sisamaasut Inatsisartut ataasinngorpat oqaluuserissavaat. Ilaatigut imigassanik assersuineq, imigassanik pilerisaarisaareqqusiunnaarnerup atorunnaasinneqarnissaa imigassanillu tuniniaasarnerup ammasarfiisa allanngortinneqarnissaat oqaluuserineqassapput.
Kalaallit Nunanni Brugsenimi tuniniaanermut pisortaq allaannguutissatut siunnersuutinut isumaqataanerarput, aammasarfinnulli tunngatillugu inatsit iluaqutitaqartoq oqaatigaa:
- Imigassat ullaakkut qulingiluanut ammartarallarmata nangillutik fiisterniartut imigassarsiniartullu takussaasimaqisut maannakkut takussaarpianngillat, Jes Nyborg oqarpoq.
Imigassanilli assiaqusersuinngikkaluarluni imigassamik atueriaaseq pillugu paasissutissiisarnissaq tulluunnerussasoq taassuma ilanngullugu oqaatigaa.
- Inerteqquteqarnermut taarsiullugu kissatigaarput pisisartutsinnut paasisitsiniaanissaq, soorlu imigassartorpallaaruit susoqartarnersoq. Imminut killilerlutit imersinnaavutit imaluunniit silaarunniutigisinnaavat, Kalaallit Nunanni Brugsenimi tuniniaanermut pisortaq Jes Nyborg KNR-mut oqarpoq.
