Ilulissani hashimik tuniniaanermi arlallit pasineqartut

Ilulissani politiit aningaasat 190.000 koruunit sapaatip akunnerata siuliani arsaarinnissutigaat, taakkulu illoqarfimmi hashimik tuniniaanermeersuussangatinneqarput. Politiit KNR-imut taama paasissutissiipput.

Akitsuuserisut aningaasat 90.000 koruunit poortukkamiittut illoqarfimmiit anninniarneqartut paasivaat. Politiit aningaasat hashimik tuniniaanermeersuussangatippaat, taamaammat nassiussisup angerlarsimaffia misissuiffigineqarpoq. Tassanilu hashimik nassaartoqartoq, Sebastian Bech, Ilulissani politiinit paasissutissiivoq.

- Tamanna tuniniaasoqarsimaneratut misissuiffigaarput, politikommisæri Sebastian Bech oqarpoq.

Inuit arlaqartut suliami pasineqarput. Hashimik tigummiaqarnermi tuniniaassussiniarnermut tuniniaanissamullu pilersaarusiornermik pasineqarlutik.

AAMMA ATUARUK Haship akiorniarneqarnera annertusaqqikkusukkaa

Aningaasarpassuit

Ilulissani politiit illoqarfimmi inuusuttunik hashimik pujortaqateqakulasoq pillugu kalerrinneqareerlutik ikiaroornartunik tuniniaasumut pingasunngormat orniguteqqipput.

Pineqartup angerlarsimaffiani misissuinikkut aningaasat 100.000 koruunit nassaarineqarput, politiillu taakku hashimik tuniniaanermeersuussangatippaat. Tamannalu tuniniaatitsinermik pasinninninngortoq, Sebastian Bech paasissutissiivoq.

AAMMA ATUARUK Ilulissani innuttaasut hashi akiorniarusuppaat

Suliarli tamaanna killeqanngilaq

Hashimullu tunngatillugu suliaq tamaanga killeqanngilaq. Ilulissani politiit Ilulissani pineqaatissinneqarsimasunut inissiisarfimmiit nalunaarfigineqarput pineqaatissinneqarsimasoq hashimik tigummiaqartoq. Tamatuma kingornatigut taassuma aappaata angerlarsimaffia misissuiffigineqarpoq hashilu 80 gram nassaarineqarluni.

Pineqaatissinneqartunut inissiisarfimmiittoq hashimik tigummiarnermik pasineqarpoq aappaalu ikiaroornartumik tuniniaasutut pasineqarluni.

Politiit suliat suli misissuiffigigaat Sebastian Bech paasissutissiivoq.

AAMMA ATUARUK Hashimik nassiussisut paasineqanngitsoortartut