Ilulissani innuttaasut hashi akiorniarusuppaat
Innuttaasunik ataatsimiititsinermi siunertarineqarpoq nunatsinni hashimik atornerluinerup akiorniarnissaanut suliniutit pillugit paasissutissiinissaq innuttaasullu isumaannik tusarniaanissaq.
Tamannalu malitsigalugu politikerit qanoq ilillutik pitsaanerusumik iliuuseqarsinnaanersut siunissamiluunniit najukkami nunalu tamakkerlugu qanoq pilersaarusiortoqassanersoq ataatsimiisitsinermi oqaluuserineqarpoq.
AAMMA ATUARUK Hashimik nassiussisut paasineqanngitsoortartut
- Erseqqippoq maani Ilulissani nunaqarfinnilu hashimik ajornartorsiuteqarneq annertusoq. Hashi paquminartutut oqallisigeqqusaannginnera ajornartorsiutaavoq. Nutaanik atuisoqalinnginnissaa anguniarlugu pitsaaliuisariaqarpugut taamaattoqassappallu piumasaqaataavoq oqallinnermi tamatta peqataasariaqartugut pisortallu suleqatigiittariaqarlutik, Peqqissutsimik naalakkersuisoq, Agathe Fontain taama oqarpoq.
AAMMA ATUARUK Hashimik akiuiniarneq nunaqarfimmiut sakkortusartikkusukkaat
Peqataasunit arlaqartunit ernumassutigineqarpoq hashimik tuniniaasartut inuiaqatigiinni sanngiinnerusut atornerlullugit iluaqutigisarmatigit.
Hashimik niuerneq aqqusinerni ammasumik pisarpoq avatangiisillu tamanna akueriinnarpaat. Ilulissani innuttaasut ilaatigut taama oqariartuuteqarput.
Innuttaasut aamma misigisimapput pisortaniit iliuuseqartoqanngippallaartoq. Annertunerusumik imaatigut angallatinik timmisartunillu nakkutiginninneq kissaatigineqarpoq.
Kiisalu hashimik atornerluisoqarnera akuersaarneqarnera annertuumik ernumassutigineqarpoq.
Peqqissutsimut naalakkersuisoq Agathe Fontain Aasiaat ataasinngormat aamma ataatsimiisitsivoq.
