Hashimik akiuiniarneq nunaqarfimmiut sakkortusartikkusukkaat
Kommuneqarfik Sermersooq nittartakkamini taama allaaserisaqarpoq.
- Isertornatik hashimik tuniniaasunut isiginnittuunerput qatsulluinnarparput. Nunaqarfimmi tamanna qatsulluinnarparput, peqqinnissaq pillugu nunaqarfimmi februaarimi ataatsimeersuartoqarmat innuttaasut taama nalunaaruteqarput.
Innuttaasut ilaasa hashimut annerusumik akiuiniartoqaqquaat. Tassungalu atasumik hasheerniarnermut akiuiniartoqarniassammat politiit Nuummeersut akulikinnerusumik pakasaallutik nunaqarfiliartarnissaat kissaatigalugu.
Inuusuttut siunissaannut akornutaavoq
- Inuusuttorpassuit ullumi hashpsykoseqarput atuarnerminnut taamalu siunissaminnut akornusiisumik. Taamaattumik politiit qinnuigaavut akulikinnerusumik nunaqarfiliartaqqullugit, tuniniaasartullu ornillugit misissuiffigalugit, inuusuttut amerlanerit siunissaat aserortinnagit, angajoqqaat ilaat oqarput.
Peqqinnissaq pillugu ataatsimeersuarnermi najuuttuupput nunaqarfimmi aqutsisut, kommunimi politikerit, politiit Namminersorlutik Oqartussaneersullu innuttaasut ikiorneqarnissartik qinnutigimmassuk.