Hashimik nassiussisut paasineqanngitsoortartut
Aanngajaarniutit pillugit suliat 54 procentiini pisuusut pineqaatissinneqartartut Kalaallit Nunaanni Politiit ukiumoortumik nalunaarusiaanni atuarneqarsinnaavoq. 5 procentii pisuunngitsuusarput, 41 procentiinilu pisuusut paasineqanngitsoortarlutik. Tassa 41 procentiini pinerluttup kinaanera qulakkeerneqanngitsoortarpoq.
Paasineqanngitsoortartut 69 procentiini uppernarsaatissaqannginneq pissutaasarpoq.
Taamaattoqarnerali politimesteri Bjørn Tegner Bay naapertorlugu nassuiaatissartaqarpoq.
Assersuutigalugu Danmarkimiit hashimik annikitsumik allakkatigut inuup najugaqarfianut nassiussisoqarpat nassinneqartullu nassiussaq ilisimaqarfiginnginnerarlugu taava pinerluttup kinaanerata uppernarsineqarnissaa ajornakusuulertarpoq. Nassiussisormi kinaanini allanngissimasinnaavaa imaluunniit inuup allarluinnaap atianik nassiussisutut allassimasinnaalluni.
- Qujanartumillu ilanngaaserisut uagullumi hashi nassaarisarparput arsaarinnissutigisarlugulu, Bjørn tegner Bay oqarpoq, nangillunilu;
- Suliani taamaattuni nassinneqartoq soorunami ornittarparput, ilisimasaqannginneraraangalli uppernarsaatit amigarneri pissutaallutik suliaq unitsiinnartariaqartarparput, Bjørn Tegner Bay KNR-imut nassuiaavoq.
- Suliamummi atatillugu pineqaatissiisoqarsinnaanissaa 100 procentimik qulakkeersinnaanngikkutsigu suliaq eqqartuussivimmi suliassanngortissinnaanngilarput. Tassalu politiitut unnerluussisussaatitaasutullu suliatsinni kinaassusersiortuunginnissamik piumasaqaateqarfigineqarnitta ilagaa. Innuttaasut eqqortumik pineqarnissaannut tunngavoq, taavalu aamma eqqartuussivimmik piffissaajaasussaanata, Politimesteri oqarpoq.
AAMMA ATUARUK Politiinut unnerluutiginninnerit qaffariaateqartut