Politiinut unnerluutiginninnerit qaffariaateqartut
2015-imili nalunaarutigineqartunut nalinginnaasumit ikinnerusunut nalilersuisoqartoq eqqarsaatigineqassasoq, politiit 2016-imut ukiumut nalunaarusiaminni marlunngormat ualikkut saqqummersinneqartumi allapput.
Politiit kisitsisit qaffariarnerat aarlerinarsorinngikkaluarlugit eqqarsarnartoqartippaat.
- Kisitsisit nakkutiginninnerunissamut eqqarsarluarnissamullu pissutissaqartitsipput.
- Kisitsisinit appariartortunit qaffatallanneruinnaava, inuiaqatigiilluunniit akornanni pinerluttunik nalunaarutiginninnerusoqartalersimaneranik takussutissaava, kisitsisilluunniit qaffariarnerat pinerluttuliornerit amerliartornerannik takussutissaappat? politimesteri, Bjørn Tegner Bay aperivoq.
Nakuuserneq inituvoq
Nalunaarusiaq qimerlualaaraanni inooqatinut sakkortuuliornerit amerlasuut nalunaarutigineqarsimasut takuneqarsinnaavoq. Politiinut nalunaarutiginninnerit sisamararterutaat taakkununnga tunngasarput. Assersuutigalugu politiit angerlarsimaffimmi eqqissiviilliortoqarneranut 2016-imi 2200-eriarlutik ornigupput. Taakkunanga 331-t meerartaqarput.
AAMMA ATUARUK Pinerluttuliornerit suli ikiliartorput
Tamakku saniatigut kinguaassiutitigut pinngitsaalineqarnermik nalunaarutiginninnerit 151-iupput, 79-illu meeqqanik kinguaassiutikkut kannguttaatsuliornerullutik.
Pinerlunnerit taakkorpiaat immikkut akiorniarneqartariaqartut, Politimester, Bjørn Tegner Bay isumaqarpoq:
- Inooqatinut sakkortuuliornerit inunnut ajoqusiingaatsiartarput. Timikkut ajoqusiiginnarnatik aamma tarnikkut kingunerlutsitserujussuartarput, politimesteri allappoq.
Takussutissat pitsaasut
Ukiumut nalunaarusiami aamma ajunngitsunik takussutissaqarpoq. Inuusuttut pinerlunnerusalersimanngillat, tamannalu pitsaaliunermik suliaqarnerup iluatsilluarsimaneranik takussutissaasinnaasoq, Bjørn Tegner Bay isumaqarpoq.
Politiit ukiumut nalunaarusiaat uani takuuk. (danskisuinnaq allaqqavoq)
AAMMA ATUARUK Politiet ser sammenhæng mellem arbejdsløshed og kriminalitet
