Kujataani politiit: Narsami suliffissaaleqinerujussuup kalluagai amerlapput
- Tamanna qangali malugisarparput. Tassa suliffissuit ilaat matuneqaraagata, ajornartorsiutit annertuut pilersarneri malugisaratsigit. Soorlu angerlarsimaffinni eqqissiviilliornerit, tilliniarnerit, aserorterinerit, imigassamik atuivallaarnerit tamakkulu assigisaat torinngitsumik pissusilersornerit aallartittarmata, Kujataani politiit ittuat, Bent Ole Kleist oqarpoq.
Narsami inupiluusernerit siorna amerleriarput
Nunatsinni Politiit ukiumoortumik nalunaarutaanni 2014-meersumi atuarneqarsinnaavoq, Narsami inuupiluusernerit pillugit politiinut nalunaarutigineqartartut 2013-imut naleeqqiullugit 2014-mi maslunnaatilimmik amerleriarsiarsimasut, tassa siorna nalunaarutigineqartut 230-iupput 2013-imi taamaallaat 173-iullutik.
Tamannalu illoqarfimmi innuttaasut akornanni suliffissaaleqisoqarneranik pissuteqarsinnaalluartoq, Bent ole Kleist oqarpoq.
- Tassa imaappoq, suliffissaaleqineq sunut tamanut kalluaannguatsiarpoq. Aamma ikiaroornartulerinitinni kisitsisit takutippaat, ikiaroornartoq hashi ajornartorsiutaanerulersimasoq. Aamma imigassartorpallaartoqarnerata ikiaroornartumillu atuisoqarnerata kinguneranik eqqissiviilliornerit pillugit Narsami innuttaasut ilaasa akutsunngitsumik nalunaarfigisarpaatigut, Bent Ole Kleist oqarpoq.
Suliffissaaleqineq pissutaalluni inigisaminnit anisitaasut amerlapput
Narsami ilaqutariit 20-it sinneqartut inigisaminnit qanittukkut anisitaanerannut suliffissaaleqineq pissutaasimasinnaasoq, Bent Ole Kleistip ilimagaa taamatullu suliffissaaleqinerup kinguneranik aamma imigassamik ikiaroornartumillu atuipilunnerit pissuteqassasut, Bent Ole Kleistip ilimagaa.
- Narsami suliffissaaleqineq annertuvoq, taamatullu inigisaminnit akiliisinnaanngitsut amerlallutik tamartumalu kinguneranik ilaqutariit inigisaminnit anisitaasut arlaqarlutik. Kisitsisaatittalu takutippaat, imigassaq pissutigalugu angerlarsimaffinni eqqissiviilliornerit amerlasoorujussuusut.
Kujataani politiit ittuat Politikommissæri, Bent Ole Kleist oqarpoq erseqqissarlugulu, Narsami innuttaasut ilaasa angerlarsimaffimminnik anisitaasarneri inuiaqatigiit tamarmiullutik ajornartorsiutigigaat oqarlunilu tamanna politiit kisimik aaqqissinnaanngikkaat.